विराटनगर । प्रमुख प्रतिपक्ष दल नेकपा (एमाले)को संकल्पयात्रामा अवरोध सिर्जना गरेको आरोपमा केही पहिचानवादी नेता–कार्यकर्ता पक्राउ परेका छन् । मंगलबार प्रहरीले उनीहरूलाई नियन्त्रणमा लिएको हो ।

पक्राउ पर्नेमा जनता समाजवादी पार्टी (जसपा)का तर्फबाट कोसी प्रदेशसभा सदस्य रहेकी मीना राई समेत छिन् । उनलाई भोजपुरबाट पक्राउ गरिएको प्रहरीले जनाएको छ ।

यस्तै, पूर्वमन्त्री एवं पहिचानवादी नेता गोपाल किराँतीलाई पक्राउ गरिएको छ । उनलाई खोटाङको हलेसीबाट नियन्त्रणमा लिइएको प्रहरीले जानकारी गराएको छ ।

भोजपुर र खोटाङबाट गरी नौ पहिचानवादी नेता–कार्यकर्तालाई पक्राउ गरिएको प्रहरीले जनाएको छ ।

कोसी प्रदेशमा पहिचानवादी पक्षधरले आजदेखि मध्यपहाडी (पुष्पलाल) मार्गमा बन्द आह्वान गरेको छ । बन्दको अवज्ञा गरेको भन्दै उनीहरू आगजनीमा समेत उत्रिएका छन् ।

यही मंसिर १४ गतेदेखि सुरु गरिएको एमालेको झुलाघाट–चिवाभञ्ज्याङ संकल्पयात्रा मंगलबार कोसी प्रदेशमा प्रवेश गरेको छ ।