![समर्थकको मृत्युपछि ग्रानाडा र एथ्लेटिको बिल्वाओबीचको खेल स्थगित](https://12khari.top/uploads/posts/ewfdg-1702265319.jpg)
काठमाडौं । मैदानमा उपस्थित समर्थकको मृत्यु भएपछि स्पेनिस ला लिगामा ग्रानाडा र एथ्लेटिक बिल्वाओबीचको खेल स्थगित गरिएको छ ।
आइतबार खेलको १७औँ मिनेटमा ग्रानाडाका एक समर्थक ह्रदयाघातका कारण मैदानमा लडेपछि खेल रोकिएको थियो । ती समर्थकसँग ग्रानाडाको सिजनभरको टिकट रहेको अन्तर्राष्ट्रिय सञ्चारमाध्यमले जनाएका छन् ।
घटना भएको एक घण्टापछि खेल स्थगित गरिएको थियो । ला लिगाले सो खेल सोमबार १७ मिनेटदेखि नै सुरु हुने जनाएको छ । टिकट किनेका समर्थकले खेल हेर्न पाउने अफिसियलले जनाएका छन् । खेलमा इनाकी विलियम्सको गोलमा एथ्लेटिकोले १–० को अग्रता बनाएको थियो ।
ला लिगाको तालिकामा एथ्लेटिको बिल्वाओ १५ खेलबाट २८ अंकसहित छैटौँ स्थानमा छ । रेलिगेसन क्षेत्रमा रहेको ग्रानाडाको समान खेलबाट सात अंक मात्र छ ।