काठमाडौं । नेपाली कांग्रेसका नेता डा. शेखर कोइराला समूहको बैठक बोलाइएको छ । नेता कोइरालाले यही मंसिर २६ गते बस्ने गरी बैठक आह्वान गरेको समूहका एक नेताले जानकारी दिए ।

पुस १६ देखि १९ गतेसम्मका निम्ति तय महासमिति बैठकलाई मध्यनजर गर्दै शेखर समूहको बैठक बोलाइएको हो । बैठकमा कांग्रेसको १४औँ महाधिवेशनमा समूहबाट जितेका केन्द्रीय सदस्यसहित पदाधिकारी मात्र होइन, निर्वाचन हारेकाहरूलाई पनि बोलाइएको एक नेताले जानकारी दिए ।

“महासमिति बैठकविशेष छलफल हो,” ती नेताले बाह्रखरीसित भने, “समूहबाट १४औँ महाधिवेशनमा उमेदवार बनेका सबैलाई बोलाइएको छ ।”

महासमिति बैठकको मिति सारिने अवस्थामा भने आफूहरूको छलफल पनि प्रभावित हुन सक्ने उनको भनाइ छ । “उपत्यकाबाहिरका साथीहरूलाई बोलाउने काम हुँदै छ । पर्सि (मंगलबार) बैठक बस्ने कुरा छ,” उनले भने, “तर, सञ्चारमाध्यममा आएअनुसार महासमिति बैठक सर्ने भयो भने बैठक के गर्ने भन्ने पनि छ । भोलिसम्म टुंगो लाग्ला ।”