काठमाडौं । त्रिभुवन विमानस्थलबाट बिहीबार राति १४ किलो सुनसहित पक्राउ परेका गोरखा बारपाकका चन्द्र्रबहादुर घले करिब दुई वर्ष अघिदेखि नै सुन तस्करीमा संलग्न रहेको तथ्य खुलेको छ । 

प्रहरी र भन्सार कार्यालयको प्रारम्भीक अनुसन्धानले घलेले लामो समयदेखि सुन तस्करी गर्दै आएको खुलाएको हो । प्रहरी स्रोतबाट प्राप्त घलेको ट्राभल रेकर्डले पनि सो कुराको पुष्टि गर्छ ।  ४५ वर्षीय घले पहिलोपटक २९ मे २०२२ मा दुवई उडेको देखिएको छ । उनी दुवईबाट त्यो बेला नै दुई दिनपछि १ जुनमा फर्किएका थिए ।

त्यस्तै दोस्रोपटक २९ जुनमा गएर २ जुलाईमा फर्किएको देखिएको छ ।  त्यसको २५ दिनपछि उनी फेरि २७ जुलाईमा दुवई उडे ।  उनी त्यो बेला पनि तीन दिनपछि नै नेपाल फर्किए । उनी ३० जुलाईमा नेपाल फर्किएको खुलेको छ ।

यो क्रम उनको निरन्तर देखिन्छ । चौथोपटक भने उनी करिब एक महिनाको अन्तरालपछि मात्रै दुवई उडे ।  यो पटक उनी १ सेप्टेम्बरमा गएर फेरि तीन दिन मै फर्किए । उनी ४ सेप्टेम्बरमा नेपाल फर्किए । पाँचौपटक उनी १३ सेप्टेम्बरमा गएर १६ मा फर्किए । 

त्यस्तै छैठौं पटकमा उनी अक्टोबर १२ मा गएर १६ मा फर्किए । सातौंपटक उनी करिब एक महिनाको अन्तरालमा फेरि दुवई उडे । उनी त्यो बेला ९ नोभेम्बरमा गएर फेरि तीन दिनपछि १३ मै फर्किएको खुलेको छ ।

यो क्रम उनको यतिमै सीमित छैन । २०२३ मा पनि उनी पाँचपटक दुवई पुगेको खुलेको छ ।  प्रहरीको प्रारम्भीक अनुसन्धानले उनी सुन तस्करीकै लागि दुवई पुग्ने गरेको देखिएको छ । २०२३, ७ फेब्रुअरीमा दुवई गएर १० मै उनी नेपाल फर्किएका थिए । 

त्यसपछि भने उनी करिब तीन महिना दुवई गएनन् ।  घले १० मे मा गएर १३ मे मा फर्किएको खुलेको छ । त्यसको फेरि चार महिना पछि ३ सेप्टेम्बरमा गएर ५ मा नेपाल फर्किए ।  यो क्रम उनले जारी राखे १५ अक्टोबरमा गएर १८ मा फर्किए । 

पाँचौंपटक उनी ४ डिसेम्बरमा गएर ८ मा फर्किएका थिए । त्यसबेला उनी १४ किलो सुनसहित पक्राउ परेका हुन् । प्रहरीको रेकर्डअनुसार उनी २४ पटक ओहोरदोहोर गरेका छन् । घलेलाई यो पटक भन्सार कार्यालय र प्रहरीको संयुक्त टोलीले पक्राउ गरेको हो । 

फ्लाई दुवईको एफजेड ५७३ को उडानबाट बिहीबार राति ११ः५६ बजे त्रिभुवन विमानस्थल ओर्लिएका उनले १४ किलो सुनसमेत ल्याएका थिए ।  प्रहरीको प्रारम्भीक सोधपुछका क्रममा घलेले आफू सुनको भरीयामात्रै रहेको बयान दिएका छन् । 

हाल बरामद भएको १४ किलो सुन गोरखाकै मीनबहादुर घलेको भएको बयान दिएका छन् । सोही बयानको आधारमा प्रहरीले मीनबहादुरलाईसमेत पक्राउ गरिसकेको छ ।  मीनबहादुरले भने सुन आफ्नो नभएको इन्कारी बयान दिएका छन् । 

प्रहरीले चन्द्र घले र मीनबहादुरको कनेक्सनबारे अनुसन्धान थालेको छ ।  चन्द्रले दुई–दुई किलोका सातवटा सुनका बिस्कुट शरीरमा लुकाएर ल्याउने क्रममा पक्राउ परेका हुन् । उनीले प्रत्येकपटक सुन तस्करी गरेबापत ६० हजार रुपैयाँ पाउने गरेको बयान अनुसन्धान टोलीलाई दिएका छन् । 

चन्द्र घले सयौँ किलो सुन तस्करी गरेको आशंका प्रहरीको छ । तस्करीमा भन्सार कार्यालकै कर्मचारीकोसमेत सेटिङ हुनसक्ने आशंका गरिएको छ । सो तस्करी प्रकरणबारे अनुसन्धान गर्न त्रिभुवन विमानस्थल भन्सार कार्यालयले भन्सार प्रमुख उपसचिव मनिराम पौडेलको संयोजकत्वमा ६ सदस्यीय छानबिन समितिसमेत नै गठन भएको छ ।

जसमा विमानस्थल प्रहरी कार्यालयका डीएसपी सूर्यप्रकाश सुवेदीसहित भन्सार अधिकृत मञ्जु थापा, प्रकाश निरौला, डिल्लुप्रसाद शर्मा र लोकराज ढुंगाना सदस्य छन् । समितिलाई पाँच दिनभित्र प्रतिवेदन बुझाउने समय तालिका दिइएको छ ।

१४ किलो बरामद भएको दुई दिनमै फेरि ६ किलो बरामद

चन्द्र घलेको साथबाट १४ किलो सुन बरामद भएको दुई दिनपछि नै फेरि दुवईबाट नै काठमाडौं आएको सोही फ्लाई दुवईको एफजेड ५७३ कै उडानबाट शनिबार राति ११ः५६ बजे साढे ६ किलो सुनसहित तीनजनालाई नियन्त्रणमा लिएको छ ।

विमानस्थल प्रहरीका एसपी पदम विष्टका अनुसार भन्सार एरिया पार गरिसकेको अवस्थामा सुनको धुलो बनाएर ल्याइएको सुन बरामद भएको हो ।  एसपी विष्टका अनुसार कालो प्लास्टिक भित्र बेरेर सुन ल्याएका इजिप्टका नागरिक ३२ वर्षीय महोमद महोमद ल्यासिनसहित ३ जना पक्राउ परेका हुन् ।

पक्राउ परेका अन्य दुई जना सुडानी नागरिक हुन् ।  उनीहरुको भूमिका शंकास्पद देखिएपछि पक्राउ परेका हुन् ।  शुक्रबार नै प्रहरीको उपत्यका अपराध अनुसन्धान कार्यालयको टोलीले काठमाडौं भित्रिने नाका नागढुंगाबाट दुई किलोसहित तीनजना पक्राउ गरेको छ ।