काठमाडौं । परराष्ट्रमन्त्री एनपी साउदले हमासले बन्धक बनाएका कञ्चनपुरका विपीन जोशीको रिहाइको लागि पहल गरिदिन कतारसँग फेरि आग्रह गरेका छन् । 

नेपालका लागि कतारका राजदूत मिशाल मोहम्मद अल अन्सारी मंगलबार परराष्ट्रमन्त्री साउदसँग भेट्न सिंहदरबारस्थित परराष्ट्र मन्त्रालय पुगेका थिए ।
 
सोही भेटका क्रममा परराष्ट्रमन्त्री साउदले कतारका राजदूतसँग हमासको नियन्त्रणमा रहेका जोशीको रिहाइको लागि पहल गरिदिन आग्रह गरेका हुन् । 

जवाफमा राजदूत अन्सारीले इजरायल र विद्रोही हमासबीच पुनः सुरु भएको युद्ध रोक्न कतार सरकारले पहल गरिरहेको जानकारी दिएका थिए ।

साथै उनले नेपाली विद्यार्थी जोशीसहितका अपहरणमा परेकाहरूको रिहाइका लागि समेत प्रयास जारी रहेको जवाफ दिएका थिए । 

“इजरायल र हमासबीच पुनः युद्ध सुरु भएको छ । परिस्थिति जटिल छ । यद्यपि, अर्को युद्ध विरामका लागि पहल भइरहेको छ,” परराष्ट्रमन्त्री साउदसँग राजदूत अन्सारीले भने, “हामीले बन्दीहरू छुटाउनका लागि पनि प्रयास गरिरहेका छौँ ।”

मन्त्री साउदले यसअघि मंसिर ८ गते कतारका विदेश राज्यमन्त्री सुल्तान बिन साद अल–मुखारीसँग मन्त्रालयमा भएको भेटमा जोशीको रिहाइका लागि पहल गरिदिन आग्रह गरेका थिए । 

यस्तै, उनले मंसिर ७ गते इजरायलका राजदूत हनान गोडरलाई मन्त्रालयमा बोलाएर जोशीको रिहाइका बारेमा कुरा गरेका थिए । 

परराष्ट्रमन्त्री साउद डिसेम्बर १० देखि कतारमा सुरु हुन गइरहेको दोहा २१औँ फोरममा सहभागिता जनाउँदै छन् । सोही क्रममा हुने उच्चस्तरीय भेटमा पनि जोशीको रिहाइको विषय गम्भीरताका साथ उठाउने जनाइएको छ । 

मन्त्रालयमा मंगलबार भएको भेटमा परराष्ट्रमन्त्री साउद र कतारका राजदूत अन्सारीबीच दोहा फोरम भ्रमण, कतारमा हुने उच्चस्तरीय भेटघाट लगायतका विषयमा छलफल भएको थियो ।