काठमाडौं । ‘नवौँ नेपाल अन्तर्राष्ट्रिय व्यापार मेला’मा करिब साढे दुई करोडको कारोबार भएको छ । नेपाल उद्योग वाणिज्य महासंघका अनुसार सोमबार सम्पन्न पाँचदिने मेलामा करिब साढे दुई करोडको कारोबार र करिब २५ हजार अवलोकनकर्ता सहभागी भएका हुन् ।

ग्राहकलाई लक्षित गरेर नेपाल, बंगलादेश र पाकिस्तानले मात्रै स्टल राखेकाले अपेक्षाअनुसारको कारोबार नभएको महासंघका सहायक निर्देशक परशुराम नेपालले बताए ।

उनले भने, "इन्डियाको कन्जुमर फियर भन्दा पनि पावर सो थियो । चाइनाको मेसिनरी टेक्नोलोजीसँग रिलेटेड भएकाले उनीहरूले डाइरेक्ट सेल भन्दा पनि नेटवर्किङको हिसाबले आए । करिब ६० वटा नेपाली स्टल अनि इन्डियन, बंगलादेश र पाकिस्तानको ५/७ वटा, ५/७ वटा चाहिँ बिक्री गर्ने स्टलहरू भएको हिसाबले करिब साढे दुई करोड जति कारोबार भएको अनुमान गरिएको छ ।"

नेपालमा उत्पादित निर्यातयोग्य वस्तुहरूको बजारीकरण गर्नका लागि सो मेला आयोजना गरिएको थियो । बजार प्रवर्धनको हिसाबले भने मेला फलदायी रहेको महासंघको निष्कर्ष छ । मेलामा नेपाली हस्तकलाका सामग्री, बंगलादेशको कपडा र पाकिस्तानको लेदरब्याग, पर्स, जाकेटलगायतका सामग्रीहरूमा ग्राहकहरूले चासो दिएका थिए ।

प्रतिनिधिसभाका सभामुख देवराज घिमिरेले गत मंसिर १४ गते उद्घाटन गरेको सो अन्तर्राष्ट्रिय मेलामा नेपाल, भारत, चीन, बंगलादेश, पाकिस्तानसहित करिब २०० वटा स्टल राखिएको थियो ।

नेपाल उद्योग वाणिज्य महासंघको नेतृत्वमा हरेक वर्ष नेपालमा अन्तर्राष्ट्रियस्तरको मेला हुने गरेको छ ।