काठमाडौं । लिग लिडर इन्टर मिलानले इटालियन सिरी ‘ए’ मा नापोलीविरुद्ध ३–० को सहज जित निकालेको । 
    
आइतबार स्टाडियो अमान्डो म्याराडोना रंगशालामा सम्पन्न खेलमा घरेलु टिमविरुद्ध सहज जित दिलाउन हाकान काल्हानोग्लु, निकोलो बरेला, मार्कुस थुरमले एक गोल गरे । 

पहिलो हाफ हुन एक मिनेट बाँकी रहँदा घरेलु टिमविरुद्ध अग्रता बनाएको इन्टरले दोस्रो हाफमा दुई गोल थप्यो । ४४औं मिनेटमा काल्हानोग्लुले गोल गर्दै घरेलु समर्थकविरुद्ध इन्टरलाई अग्रतामा राखेका थिए । 

६१औं मिनेटमा निकोलो बरेलाले इन्टरको अग्रता दोब्बर पारे । यस्तै, ८५औं मिनेटमा थुरमले गोल गरेपछि इन्टरले तीन अंक सुनिश्चित गर्यो । 

जितसँगै १४ खेलबाट ३५ अंक जोडेको इन्टर तालिकाको शीर्ष स्थानमा छ । यो जितसँगै इन्टरले दोस्रो स्थानको युभेन्ट्ससँग दुई अंकको अग्रता बनाएको छ । समान खेलबाट २४ अंक जोडेको नापोली तालिकाको पाँचौ स्थानमा छ ।