काठमाडौं । सामाजिक सुरक्षा कोषमा हालसम्म नौ लाख २८ हजार ४५३ व्यक्ति र १८ हजार ४३९ संस्थाहरु आवद्ध भएका छन् । सामाजिक सुरक्षा दिवसकाे अवसरमा उक्त तथ्यांक सार्वजनिक गरिएको हो ।

सरकारले प्रत्येक वर्षको मंसिर ११ गतेलाई सामाजिक सुरक्षा दिवसको रुपमा मनाउने गरेको छ । सोहीअनुसार आज सामाजिक सुरक्षा दिवस हो ।

कोषमा आवद्ध हुनेमा सातै प्रदेशबाट चार लाख ६१ हजार ७९६ जना रहेका छन् भने विदेशबाट चार लाख ६६ हजार ६२२ जना जोडिएका छन् । औपचारिक रुपमा तीनजना र स्वरोजगार ३२ जना कोषमा जोडिएका छन् ।

कोषले औषधि उपचार, स्वास्थ्य तथा मातृत्व योजना, दुर्घटना तथा अशक्तता सुरक्षा योजना, आश्रित परिवार सुरक्षा योजना, वृद्ध अवस्था सुरक्षा योजना, अतिरिक्त योगदान र प्रतिफल गरी ६ सुरक्षा योजना मानिसहरु जोडिएको बताएको छ ।

सबै योजनामा गरेर कोषमा ४४ अर्ब ८५ करोड रुपैयाँ संकलन भएको छ । सामाजिक सुरक्षामा आवद्ध दुई लाख २२ हजार ८०७ जनालाई ६ अर्ब ४४ करोड रुपैयाँ दाबी भुक्तानी गरिएको कोषले जनाएको छ ।

यस्तै, एक लाख १० हजार ३७२ जनाले भुक्तानीका लागि दाबी गरेका छन् ।