काठमाडौं । स्पेनिस ला लिगामा साविक विजेता बार्सिलोनाले रायो भालेकानोसँग १–१ को बराबरी खेल्दै अंक बाँडेको छ । शनिबार राति रायो भालेकानोको मैदान स्टाडियो डे भालेसाजमा १–० ले पछि परेको अवस्था उल्ट्याउँदै बार्सिलोनाले हार टारेको हो ।

खेलको ३९औँ मिनेटमा युनाइ लोपेजले गरेको गोलबाट घरेलु टिमले साविक विजेताविरुद्ध अग्रता बनाएको थियो । तर, निर्धारित समय सकिन आठ मिनेट बाँकी रहँदा फ्लोरियन लेजेयुनेबाट आत्मघाती गोल उपहार पाएपछि बार्सिलोनाको हार टरेको थियो ।

बराबरीमा रोकिएसँगै बार्सिलोनाले तालिकाको दोस्रो स्थानमा उक्लने मौका गुमायो । १४ खेलबाट ३१ अंक जोडेको बार्सिलोना चौथो स्थानमा छ । बार्सिलोना शीर्ष स्थानको जिरुनाभन्दा तीन अंकले पछाडि छ । एक खेल कम खेलेको जिरुनाको ३४ अंक छ । १४ खेलबाट १९ अंक जोडेको रायो भालेकानो नवौँ स्थानमा छ ।

एट्लेटिको मड्रिड १–० मायोर्का
शनिबार राति नै भएको अर्को खेलमा एट्लेटिको मड्रिडले मायोर्काविरुद्ध १–० को कठिन जित निकाल्यो । एट्लेटिकोलाई जित दिलाउन एन्टोनियो ग्रिजमनले निर्णायक गोल गरे । ग्रिजमनले ६४औँ मिनेटमा गोल गरेका थिए ।

जितसँगै १३ खेलबाट ३१ अंक जोडेको एट्लेटिको मड्रिड तालिकाको तेस्रो स्थानमा छ । समान खेलबाट नौ अंकको मायोर्का १७औँ स्थानमा छ ।