काठमाडौं । अवैध आर्थिक गतिविधि गरेको आरोप लागेका बाइनान्सका प्रमुख कार्यकारी अधिकृत (सीईओ) चाङपेङ झाओले पदबाट राजीनामा दिएका छन् ।

केम्यान टापुमा दर्ता रहेको बाइनान्स विश्वकै सबैभन्दा ठूलो क्रिप्टोकरेन्सी एक्सचेन्ज गर्ने प्लेटफर्म हो ।

“मैले गल्ती गरे र यसको जिम्मेवारी मैले लिनुपर्छ । यो नै हाम्रो समुदाय, बाइनान्स र मेरो लागि उपयुक्त कदम हो,” उनले एक्समा लेखेका छन् ।

अमेरिकी न्याय विभागले बाइनान्सले विश्वभर प्रतिबन्ध बाइपास गर्न मद्दत गरेको भन्दै ४.३ अर्ब अमेरिकी डलर जरिबाना तोकेको छ ।

बाइनान्सका माध्यमबाट अमेरिकी र इरानी प्रयोगकर्ता बीच ९० करोड अमेरिकी डलर बराबरको कारोबार भएको बताइएको छ ।

यस्तै, बाइनान्सले सिरिया, रुसी क्राइमिया, डोनेट्स्क र लुहान्स्क लगायतका क्षेत्रमा अमेरिकी प्रयोगकर्ताबीच करोडौँको कारोबार सक्षम पारेको बताइएको छ ।

अमेरिकी न्याय विभागले यो कारोबारले आतंकवादीलाई पैसाको कारोबार गर्न सहज बनाएको बताएको छ । अर्बपति झाओ क्रिप्टोक्षेत्रका प्रभावकारी व्यक्ति हुन् ।

बाइनान्सका ग्लोबल क्षेत्रीय बजार प्रमुख रिचर्ड टेङलाई सीईओमा नियुक्त गरिएको उनले बताए । 

बाइनान्सका संस्थापक समेत रहेका चाङपेङ झाओले कम्पनी अब सानो नभएको भन्दै भविष्यमा यो विस्तार हुँदै जाने र अग्रगामी स्थान कायम राख्नेमा विश्वास व्यक्त गरेका छन् ।