काठमाडौं । सरकारले अर्थतन्त्रको समस्यालाई छिटो, छरितो रूपमा समाधान गर्नेबारेमा छलफल गरेको छ ।

सोमबार प्रधानमन्त्रीको सरकारी निवास बालुवाटामा प्रधानमन्त्री पुष्पकमल दाहाल 'प्रचण्ड', अर्थमन्त्री डा. प्रकाशशरण महत, गभर्नर महाप्रसाद शर्मा लगायतका सम्बन्धित पदाधिकारीहरूसँग छलफल गरी अर्थतन्त्रका वर्तमान समस्या छिटो समाधान गर्नुपर्नेमा जोड दिइएको हो ।

बैठकपछि सञ्चारकर्मीहरूसँग कुरा गर्दै अर्थमन्त्री डा. प्रकाशशरण महतले अर्थतन्त्रको समस्या छिटो र छरितो रुपमा समाधान गर्ने बारेमा छलफल भएको बताए । उनले अर्थतन्त्रलाई अझ चलायमान गर्नको लागि सुझाव लिन मंगलबार सिंहदरबारमा पुनः बैठक बस्ने पनि बताए ।

बैठकमा आफूले आन्तरिक संरचनाका उपलब्धि, चुनौती र कार्यदिशा प्रस्तुत गरेको बताए ।

अर्थतन्त्रका बारेमा प्रधानमन्त्री र गभर्नरले पनि आफ्ना धारणा राखेका थिए । मंगलबारको बैठकमा निजी क्षेत्रसँग पनि छलफल हुने बताइएको छ । उनले देशको अर्थतन्त्रले लय समातिरहेको र बाह्य विप्रेषण, पर्यटक आगमन, शोधनान्तरको स्थितिमा राम्रो हुँदे गएको बताए ।

अर्थमन्त्रीले भने, "अर्थतन्त्रको समस्या जुन छन् ती समस्यालाई पनि कसरी समाधान गर्ने भन्ने बारेमा छलफल भयो । कसरी छिटो र छरितो रूपमा समाधान गर्न सकिन्छ, त्यसबारेमा पनि आन्तरिक रूपमा छलफल गर्‍यौँ । साथै समग्र अर्थतन्त्रलाई अझ चलायमान गर्नको लागि अरु के सुझाव, सल्लाह लिन सकिन्छ त्यो पनि गरौँ भनेर भोलि २ बजे प्रधानमन्त्री कार्यालयमा बैठक राखिएको छ । त्यसमा निजी क्षेत्र र विज्ञहरुको सुझाव लिने भन्नेबारेमा छलफल हुनेछ । आज आन्तरिक संरचनामा के उपलब्धि भयो, के चुनौती र कार्यदिशा करीब अघि बढीरहेको छ भन्नेबारेमा मैले आफ्नो कार्यदिशा प्रस्तुत गरेँ ।"

अर्थमन्त्री महतले अर्थतन्त्र छिटोभन्दा छिटो चलायमान बनाएर देशमा थप रोजगारीका अवसर सिर्जना गर्ने भन्नेबारेमा पनि छलफल भएको बताए ।