काठमाडौं । सत्ताको नेतृत्व गरिरहेको दल नेकपा (माओवादी केन्द्र)का सांसद वर्षमान पुनले सामाजिक सञ्जालमा ‘भाइरल’ हुने र बजारमा बिक्ने कुरा मात्र बोल्ने क्रम बढेको बताएका छन् । बिहीबार प्रतिनिधिसभा बैठकको विशेष समयमा उनले संस्था बलियो बनाउने सोच र प्रवृत्ति दल र सांसदहरूमा हराउँदै गएको टिप्पणी गरे ।

आफू वा आफ्नो समर्थनमा राष्ट्रपति वा सरकार हुँदा गरेको काम ठिक र आफू सत्ताबाहिर हुँदा फरक लाग्नु संस्थालाई कमजोर बनाउने काम भएको उनले बताए । सरकारमा हुँदा अपनाएको विदेश नीति बाहिर पुग्नेबित्तिकै गलत कसरी हुन्छ भन्दै उनले प्रश्न गरे ।

“संस्थागत संस्कार बनेनन् । कसले सरकार सञ्चालन गरेको छ र निर्णय भइरहेको छ भन्ने ध्यान बढी छ,” उनले भने ।

बहुलता स्वीकार गर्न नसकिएको भन्दै उनले त्यसानुसारको आचार र व्यवहार नभएको बताए ।

अहिले सदनले केही प्रयत्न गरिरहेको भन्दै सांसद पुनले नयाँ धेरै आएकाले सिक्ने काम अघि बढिरहेको उल्लेख गरे । “मिटरब्याजसम्बन्धी सामन्तवादको उपनिवेश हटाउन हामी सबै एक ठाउँमा उभिएका छौँ,” उनले भने ।

२२ विधेयक अहिले सदनमा रहेका भन्दै उनले सरकारले ‘बिजनेस’ दिन नसकेको भन्न नमिल्ने उनको भनाइ छ ।

• जनताको चाहनाविपरीत सरकारले युद्ध दिवस मनाउने गल्ती नगरोस् : पौडेल

संयुक्त राष्ट्रसंघका महासचिव एन्टोनियो गुटेरेसको भ्रमण र संसद्‌मा गरेको सम्बोधन नेपालको उपलब्धि भएको उनले बताए ।

“यसले जलवायु परिवर्तनको विषयमा सदनमा उभिएर महासचिवले बोल्नु उपलब्धि हो । यो विशेष कुरा हो, यो दलविशेष वा सरकारविशेष होइन । सबैको उपलब्धि हो,” उनले भने ।

शान्ति प्रक्रियाको बाँकी काम टुंग्याउनेतर्फ अघि बढ्नुपर्नेमा उनले जोड दिए । “विधेयक समितिमा छ, किन त्यसमा सहमति भएन भन्ने सबैलाई थाहा छ । पीडितमैत्री बन्नुपर्छ भन्ने छ,” उनले भने ।

पार्टी एकता गर्न हुने, सँगै चुनाव लड्न र सरकार बनाउन हुने तर पीडितका विषयमा किन एकमत हुन सक्दैन भन्ने प्रश्न उठाइएको उनले बताए ।