काठमाडौं । संयुक्त राष्ट्रसंघका महासचिव एन्टिनियो गुटेरेसले नेपालको संसद्को रोष्ट्रममा पहिलो पटक उभिएर संम्बोधन गरेका छन् ।
नेपाल भ्रमणमा रहेका गुटेरेसले संसद्का दुवै सदनको संयुक्त बैठकलाई संम्बोधन गरेका छन् । नेृपालको शान्ति प्रक्रियासहितका विषयमा संम्बोधन गरेका महासचिव गुटेरेसले विश्वका समस्याहरूको विषयमा पनि बताएका छन् । आज संसारमा अशान्ति रहेको भन्दै थुप्रै समस्या रहेको उनले औल्याएका छन् ।
“हामी आज संसारको अशान्तिको बीचमा एकअर्कालाई भेट्देछौँ । गरिबी र भोकमरीमा दशकौँको प्रगति उल्टिदैछन् । मुद्रास्फीतिले घरायसी र राष्ट्रिय बजेटलाई कमजोर बनाउँदैछ,” महासचिव गटेरेसले संम्बोधनमा भनेका छन्, “परिवारहरू होस वा राष्ट्रहरू, आर्थिक संकटको सामना गर्दैछन् ।”
उनले विश्वभर महिलाहरू समस्यासँग जुधिरहेको पनि उल्लेख गरेका छन् ।
“महिलाहरूको प्रतिनिधित्व जनसंख्याको अनुपातको तुलनामा र उनीहरूले पाउने पारिश्रमिक पुरुषको तुलनामा कम छ,” महासचिव गुटेरेसले भने ।
उनले हिंसा र द्वन्द्व विश्वको अर्को समस्या रहेको बताए ।
“हिंसा र द्वन्द्व चुलिएका छन् । मध्यपूर्वको द्वन्द्व नेपालबाट हजारौँ माइल टाढा हुँदा पनि इजरायलमा हमासको क्रूर आक्रमणका कारण पीडितहरूमध्ये धेरै नेपाली थिए,” महासचिव गुटेरेसले भने, “मृत्यु भएका १० नेपाली विद्यार्र्थीका परिवारजनमा गहिरो समवेदना प्रकट गर्दछु र बेपत्ता विपीन जोशीको सकुशल आगमनका लागि कामना गर्दछु ।”
उनले भूराजनीतिक विवादले विश्वव्यापी विवाद खतरनाक बन्दै गएको पनि बताए ।
“भू–राजनीतिक तनाव बढ्दै जाँदा विश्वव्यापी विभाजनहरू गहिरो र खतरनाक हुँदै गइरहेका छन,” महासचिव गुटेरेसले भने ।
उनले जलवायु परिवर्तनले प्रकोपको रूप धारण गरेको भन्दै त्यसको घातक प्रभावबाट जोगिनु अहिलेका लागि चुनौती बनिरहेको उल्लेख गरे ।
“यी संकटहरूको प्रतिकार्य गर्न विश्वले नेपालबाट धेरै सिक्न सक्छ,” नेपालको द्वन्द्व व्यवस्थापनसँग तुलना गर्दै महासचिव गुटेरेसले भने ।
