काठमाडौं । काठमाडौं उपत्यकामा रत्नपार्कदेखि सूर्यविनायकसम्म चलाइएको ‘द्रुत बस सेवा’ एक महिना नपुग्दै सुस्ताएको छ । गएको असोज ३ गते भौतिक पूर्वाधार तथा यातायातमन्त्री प्रकाश ज्वालाले द्रुत बस सेवाको उद्घाटन गरेका थिए ।
यातायात व्यवस्था विभागका निर्देशक ईश्वरीदत्त पनेरुले बडादसैँका समयमा काठमाडौंमा यात्री कम हुँदा त्यसका केही बस अरू रुटमा चलाइएको बताए ।
“दसैँको बेला उपत्यकामा यात्रु हुँदैनन्, अन्य रुटमा चल्नका लागि जुन गाडी बाहिर गएका थिए, ती फेरि सञ्चालनमा आउँदै छन्,” विभागका सूचना अधिकारी समेत रहेका पनेरुले बाह्रखरीसित भने ।
द्रुत बस सेवा नरोकिएको उनले स्पष्ट पारे । “द्रुत बस सेवा रोकिएकै छैन, चलिरहेकै छ । यात्रु नहुँदा गाडी चलनेन् । केही बाहिर गएका होलान्, ती फेरि चल्दै छन् । अब थप व्यवस्थित बनाएर लैजाने तयारी भइरहेको छ,” उनले भने ।
गएको आइतबार मन्त्री ज्वालाले सडक विभाग, यातायात व्यवस्था विभाग र उपत्यका ट्राफिक कार्यालयलगायत सरोकारवाला निकायका अधिकारीलाई बोलाएर द्रुत बस सेवालाई थप व्यवस्थित तरिकाले सञ्चालन गर्न निर्देशन दिएका छन् ।
४० मिनटेमा यात्रा यात्रा पूरा गर्न सक्ने गरी सुरुमा परीक्षणका रूपमा रत्नपार्कदेखि सूर्यविनायक रुटमा द्रुत बस सेवा सुरु गरिएको थियो । उद्घाटनअघि दुई–चार दिनभित्र सडकमा लाइन र रङ पोतेर द्रुत बस सेवाका निम्ति लेन छुट्ट्याइएको थियो ।
बिहान ९ देखि ११ र अपराह्न ४ देखि ६ बजेसम्म चलाइने भनिएका २५ द्रुत सेवाका बसका निम्ति लेन खाली गर्न खोज्दा जाम चर्किएपछि आलोचना हुन थालेको थियो ।
द्रुत बस सेवा सञ्चालनका निम्ति काठमाडौं सडक डिभिजनअन्तर्गत सूर्यविनायक–धुलिखेल आयोजनामार्फत काम गरिएको थियो । सडक डिभिजन काठमाडौंका प्रमुख नारायणदत्त भण्डारीले द्रुत बस सेवा सञ्चालनमा करिब दुई करोड रुपैयाँ खर्च भएको बताए ।
भुक्तानी हुन बाँकी र अर्काे कार्यालयले पनि हेरिरहेका कारण कति खर्च भयो भन्ने यकिन नभएको उनको भनाइ छ ।
अरू देशमा पनि यस किसिमको सुविधा रहेको र अहिले परीक्षण एवं सिकाइको चरण भएको भन्दै यसलाई प्रभावकारी बनाउनुपर्नेमा द्रुत बस सेवा सञ्चालनमा संलग्न अधिकारी जोड दिन्छन् ।
“विदेशमा ट्रेन हुन्छन्, सडक पूर्वाधार ठूलो हुन्छ । आकाशे पुल हुन्छन्, सुरुङमार्गहरू हुन्छन् । हाम्रो देशमा भएकै सडक पूर्वाधारलाई प्रयोग गरेर सार्वजनिक यातायातलाई सहज बनाउने हो, अहिले यो सुरुआत भएको छ,” सडक डिभिजन काठमाडौंका प्रमुख भण्डारीले भने ।
द्रुत बस सेवा सञ्चालनका निम्ति नेपाल यातायात व्यवसायी राष्ट्रिय महासंघले २५ गाडी उपलब्ध गराएको थियो । महासंघका वरिष्ठ उपाध्यक्ष सरोज सिटौलाले सार्वजनिक सवारीसाधनलाई प्राथमिकता दिँदै सबैजसो रुटमा द्रुत बस सेवा सञ्चालन गरिनुपर्ने बताएका थिए ।
तत्कालका निम्ति जाम र अव्यवस्थित हुने समस्या देखिए पनि दीर्घकालीन रूपमा यसले आममानिसलाई सहज यातायात सेवा उपलब्ध गराउने उनको भनाइ छ ।
तर, काठमाडौं उपत्यकाको अहिलेको सडक पूर्वाधार र ट्राफिक व्यवस्थापनलाई हेर्दा द्रुत बस सेवा सञ्चालन सफल हुनेमा आशंका छ ।
-1706524096.JPG)
