काठमाडौं । संयुक्त राष्ट्रसंघका महासचिव एन्टोनियो गुटेरेसले जलवायुअनुकूलनका निम्ति छुट्ट्याइएको कोषको रकम नेपालले पाउनुपर्ने बताएका छन् । मंगलबार अन्नपूर्ण आधारशिविरको अवलोकन भ्रमणपछि पोखरामा सञ्चारकर्मीसँग उनले यस्तो बताएका हुन् ।

महासचिव गुटेरेसले जलवायुअनुकूलनका निम्ति बनाइएका कोषहरूको रकम जलवायु परिवर्तनका कारण पीडित बनेका नेपाललगायत देशहरूले पाउनुपर्नेमा जोड दिए । उनले जलवायु परिवर्तनका कारण पीडित बनेको नेपाललाई समर्थन गर्न अरू देशहरूलाई आग्रह गरे ।

जलवायु परिवर्तनको असर कम गर्न हिमाल र हिमनदी जोगाउनुपर्ने उनले बताए ।

“हामीले यी अद्भुत हिमालहरू र यी अद्भुत हिमनदीहरू जोगाउनुपर्छ । जलवायु परिवर्तनका कारण पीडित बनेका नेपाल र नेपालजस्ता अन्य देशहरूलाई समर्थन गर्न आवश्यक छ । जलवायु परिवर्तनका कारण धेरै भागहरू भूस्खलन भएका छन् । धेरै समुदायमा जुन गहिरो रूपमा परेको नकारात्मक असर छ, यसलाई मैले अन्तर्राष्ट्रिय समुदायमा अपिल गर्नेछु,” उनले भने, “पीडित समुदायको रक्षा गर्न र जलवायु अनुकूलनको लागि धेरै कोषहरू पनि छन् । यी कोषहरू क्षति कम गर्न र पीडित जनताको फाइदाका लागि बनाइएका हुन् । त्यसको उपयोग हुनुपर्छ ।”

उनले जलवायु परिवर्तनकै कारण धेरै ठाउँमा भूस्खलन भएको उल्लेख गरे । यसबाट पीडित समुदायका निम्ति विश्वस्तरबाटै प्रभावकारी कदम चालिनुपर्ने उनले बताए । उनले जलवायु परिवर्तनको असरलाई कम गर्न प्रभावकारी ऐक्यबद्धता आवश्यक रहेकामा जोड दिए ।