काठमाडौं । कप्तान रोहितकुमार पौडेलको अर्धशतकप्रेरित नेपालले घरेलु मैदानमा आजदेखि सुरु भएको त्रिदेशीय शृङ्खलाको पहिलो खेलमा युनाइटेड अरब इमिरेट्स (यूएई)विरुद्ध सात विकेटको सहज जित निकालेको छ ।

मुलपानीस्थित माथिल्लो मुलपानी मैदानमा सम्पन्न खेलमा यूएईले प्रस्तुत गरेको १४१ रनको लक्ष्य नेपालले १८.५ ओभरमा तीन विकेट गुमाएर भेट्टायो ।

नेपालको जितमा कप्तान रोहितले अविजित ५१ रन बनाए । रोहितले ४० बलमा पाँच चौका प्रहार गरे । रोहितसँगै अविजित रहेका दीपेन्द्रसिंह ऐरीले २३ बलमा तीन चौका र एक छक्कासहित ३४ रन थपे ।

५१-३ को अवस्था रहदा यी दुईले चौथो विकेटका लागि ९० रनको साझेदारी गर्दै नेपाललाई जितसम्म डोहोर्याएका हुन् । यसबाहेक, आसिफ सेखले २३, कुशल भुर्तेलले १४ र कुशल मल्लले ११ रन जोडे ।

यूएईका अली नासिर र निलान्स केश्वानीले समान एक विकेट लिए ।

त्यसअघि, टस हारेर ब्याटिङमा आएको यूएईले निर्धारित २० ओभरमा सात विकेट गुमाएर १४० रनको योगफल खडा गरेको थियो । यूएईका बसिल हमेदले ५१ रन बनाएका थिए । उनले ३८ बलमा एक चौका र चार छक्का प्रहार गरे ।

यस्तै, अली नासीरले ३२ रन जोडे । ५२-४ को अवस्थाबाट यी दुईले पाचौँ विकेटका लागि ५६ रनको साझेदारी गर्दै यूएईलाई प्रतिस्पर्धात्मक योगफलसम्म डोहोर्याएका थिए । कप्तान मुहम्मद वसिमले १७ र आसिफ खानले १५ रन थपे ।

नेपालका करण केसीले तीन विकेट लिए । करणले चार ओभरको स्पेलमा १९ रन खर्चिए । गुल्सन झाले दुई विकेट लिँदा अभिनाश बोहरा र सोमपाल कामीले समान एक विकेट लिए ।

आईसीसी ट्वान्टी-२० विश्वकप छनोटको तयारीअनुरूप जारी प्रतियोगितामा नेपालसँगै हङकङ र युनाइटेड अरब इमिरेट्स (यूएई) सहभागी छन् ।  नेपालले अब २ गते (भोलि) र ४ गते हङकङसँग खेल्नेछ । यस्तै, नेपालले कात्तिक ६ मा यूएईसँग दोस्रो खेल खेल्नेछ । यूएई र हङकङले भने कात्तिक ५ र ८ मा खेल्नेछन् ।