काठमाडौं । दिन प्रतिदिन महँगी बढ्दै गएको छ । अहिले महँगी अत्यन्तै बढेको भए पनि नेपाल राष्ट्र बैंकले भदौ महिनासम्मको तथ्यांक सार्वजनिक गरेको छ ।

राष्ट्र बैंकले मंगलबार सार्वजनिक गरेको ‘देशको वर्तमान आर्थिक तथा वित्तीय स्थिति’ प्रतिवेदनानुसार भदौसम्म हिमाली क्षेत्रमा सबैभन्दा बढी महँगी छ । हिमाली क्षेत्रको महँगीदर ११.३२ प्रतिशत रहेको राष्ट्र बैंकले जनाएको छ ।

काठमाडौं उपत्यकाको वार्षिक विन्दुगत उपभोक्ता मुद्रास्फीति ९.८३, तराईको ७.०३ र पहाडको ८.०९ प्रतिशत छ ।

गत वर्षको भदौमा हिमाली क्षेत्रको महँगीदर ६.६८ प्रतिशत थियो ।  काठमाडौं उपत्यकाको वार्षिक महँगीदर ७.६२, तराईको ९.३३ र पहाडको ८.८२ प्रतिशत थियो ।

यो वर्ष भदौमा वार्षिक विन्दुगत उपभोक्ता महँगीदर ८.१९ प्रतिशत छ । अघिल्लो वर्षको सोही महिनामा यस्तो मुद्रास्फीति ८.६४ प्रतिशत थियो ।

समीक्षा अवधिमा खाद्य तथा पेयपदार्थ समूहको मुद्रास्फीति ९.७४ र गैरखाद्य तथा सेवा समूहको मुद्रास्फीति ६.९९ प्रतिशत छ ।

भदौमा खाद्य तथा पेयपदार्थ समूहअन्तर्गत मरमसला उपसमूहको वार्षिक विन्दुगत उपभोक्ता मूल्य सूचकांक ४५.४६, चिनी तथा चिनीजन्य वस्तुको १७.८६, तरकारीको १४.५१, खाद्य तथा खाद्यजन्य पदार्थको १३.३८, दुग्ध पदार्थ तथा अन्डाको १२.६० र रेस्टुरेन्ट तथा होटेलको १०.९७ प्रतिशतले महँगी बढेको छ । घिउ तथा तेल उपसमूहको वार्षिक विन्दुगत मूल्य सूचकांक १३.०८ प्रतिशतले महँगी घटेको राष्ट्र बैंकले जनाएको छ ।