काठमाडौं । अर्थमन्त्री डा. प्रकाशशरण महतले अर्थतन्त्र विस्तारै लयमा फर्किरहेको बताएका छन् । सोमबार काठमाडौंमा आयोजित एक कार्यक्रममा उनले यस्तो बताएका हुन् ।

उनले अर्थतन्त्रमा सकारात्मक सुधार देखिएको उल्लेख गरे । अहिले समग्रमा देशमा अनेक समस्या रहेको भन्दै उनले सबैले आफ्नो स्थानबाट सकारात्मक पहल गर्नुपर्नेमा जोड दिए ।

सरकार मात्रले अर्थतन्त्रलाई लयमा ल्याउन नसक्ने भन्दै उनले यसका लागि सबै पक्ष एकजुट भएर लाग्नुपर्ने बताए ।

“...हामी अन्तर्राष्ट्रिय परिवेश नकारात्मक हुने अवस्था नआओस् भन्ने चाहन्छौँ । त्यो नभएको अवस्थामा विस्तारै हाम्रो अर्थतन्त्रमा सुधार आउँछ । सकारात्मक कुरा देखिएका छन्,” उनले भने, “त्यसका बाबजुद अप्ठ्यारा बाँकी छन् । त्यसलाई सबैले मिलेर समाधान गर्नुपर्छ । अर्थ मन्त्रालय, सरकारले मात्रै गरेर समाधान हुँदैन । सबैले आफ्नो–आफ्नो जिम्मेवारी पूरा गर्नुपर्छ ।”

अर्थतन्त्र राम्रो बनाउन सरकारले पहल गरिरहेको उनले बताए ।