काठमाडौं । नेपाली राष्ट्रिय फुटबल टिमका मुख्य प्रशिक्षक भिन्चेन्सो अल्बर्टो एनेसले लाओसविरुद्ध आक्रामक फुटबल खेल्ने बताएका छन् । फिफा विश्वकप–२०२६ छनोटको पहिलो चरणको दोस्रो लेगमा लाओसविरुद्ध खेल्नुअघि उनले यस्तो बताएका छन् ।

छनोटको दोस्रो लेगका निम्ति नेपाली टिम हाल लाओसमा छ । नेपालले मंगलबार (भोलि) लाओससँग उसैको मैदानमा खेल्नेछ । छनोटको दोस्रो चरणमा पुग्न नेपाललाई जित्नैपर्ने दबाब छ ।

यसअघि, दशरथ रंगशालामा भएको पहिलो लेगमा नेपाल लाओससँग १–१ को बराबरीमा रोकिएको थियो । दोस्रो लेगको पूर्वसन्ध्यामा आयोजित पत्रकार सम्मेलनमा प्रशिक्षक एनेसले नेपाली टिमको तयारी निकै राम्रो रहेको बताए ।

“यहाँ आउन पाउँदा खुसी लागेको छ । पहिलो खेलमा लाओसले धेरै समय खेर फालेको थियो । रेफ्रीको निर्णय पनि हाम्रो पक्षमा थिएन । हामीले यो विषय म्याच कमिस्नरमा पनि उठाएका छौँ । दोस्रो लेगका लागि हामीले निकै राम्रो तयारी गरेका छौँ,” उनले भने, “यो खेल नेपाल र मेरो लागि पनि निकै महत्त्वपूर्ण छ । यदि, हामीले अगाडि बढ्ने हो भने हामीले जित्नुपर्छ र यो गाह्रो हुनेछ । तर, हामी भिडन्तको लागि तयार छौँ । हामी आक्रामक फुटबल खेल्नेछौँ ।”

नेपाली टिमका कप्तान किरण चेम्जोङले आफूहरूको लक्ष्य जित रहेको बताए । “निकै महत्त्वपूर्ण खेल, हामी सुन्दर फुटबल खेल्न चाहन्छौँ । पछिल्लो खेल निकै निराशाजनक रह्यो । हामीले राम्रो तयारी गरेका छौँ र अगाडि बढ्नको लागि जित हासिल गर्ने लक्ष्य राखेका छौँ,” उनले भने, “हामीले पहिलो हाफमा धेरै साना गल्तीहरू गर्‍यौँ, हामीले त्यसमा काम गरेका छौँ । टोलीको आत्मविश्वास राम्रो छ र केटाहरू भोलि राम्रो गर्न उत्प्रेरित छन् । हामी दसैँ पर्व मनाउने घर फर्केका फ्यानहरूलाई राम्रो नतिजा दिन चाहन्छौँ ।”