काठमाडौं । कोसी प्रदेशका पूर्वमुख्यमन्त्री हिक्मतकुमार कार्कीले प्रदेशमा नेपाली कांग्रेस र नेकपा (एमाले)को सहकार्य राष्ट्रिय एकताका पक्षमा र सामाजिक सद्भाव भड्काउनेको विरुद्धमा भएको बताएका छन् ।

एमाले कोसी प्रदेश संसदीय दलका नेतासमेत रहेका कार्कीले कांग्रेसका केदार कार्कीको मुख्यमन्त्रीमा शपथपछि सार्वभौमसत्ता कमजोर पार्नेहरुप्रति अब दुवै दल सचेत भएको बताए ।

“हामीले नेपालको राष्ट्रिय राजनीतिमा देखा परेका समस्या र मुलुकभित्रै संविधानलाई च्यात्ने र सामाजिक सञ्जाल भड्काउने प्रयास भइरहेको छ, नेपाल राष्ट्रको सार्वभौमसत्तालाई कमजोर पार्ने प्रयत्न भइरहेको छ । त्यसलाई कमजोर पार्न नेपाली कांग्रेस, नेकपा (एमाले) र यस विचारमा जोडिने मुलु्कका स्टेकहोल्डरहरु मिलेर जानुपर्छ भन्ने हाम्रो मान्यता हो । यसैका लागि कांग्रेस र एमालेबीच सहकार्य सुरु भएको हो,” कार्कीले भने, “कोसी प्रदेशमा मैले गरिरहेको छु । यसमा एमाले र कांग्रेसका सबै नेताहरु हुनुहुन्छ ।”

उनले पुष्पकमल दाहाल प्रचण्डले देशको प्रधानमन्त्रीका रुपमा मात्र केदार कार्कीलाई आफ्नो मुख्यमन्त्री भनेको व्याख्या गरे ।

“प्रचण्डजी देशको प्रधानमन्त्री हुनुहुन्छ । कोसी प्रदेशको मुख्यमन्त्रीलाई प्रधानमन्त्रीले मेरो मुख्यमन्त्री भन्नु स्वभाविक हो,” कोसी प्रदेशको मुख्यमन्त्रीलाई गठबन्धनकै मुख्यमन्त्री भन्नुभएको छ नि भन्ने प्रश्नमा कार्कीले भने, “कोसी प्रदेश सरकारमा उहाँहरु हुनुहुन्न । यो सरकार निर्माणको प्रक्रियाबाटै बाहिर हुनुहुन्छ ।”

उनले नेकपा (माअ‍ोवादी केन्द्र)ले सरकारमा सहभागी हु्न प्रस्ताव राखेको खण्डमा कांग्रेस र एमालेबीच छलफल हुने बताए ।