काठमाडौं । मनाङ एयरको हेलिकोप्टर दुर्घटनामा परी घाइते भएका पाइलट प्रकाश सेढाईंलाई थप उपचारका निम्ति भारत लगिएको छ । उनलाई मुम्बईस्थित नेसनल बर्न सेन्टरमा लगिएको मनाङ एयरका सेफ्टी मेनेजर राजु न्यौपानेले जानकारी दिए ।

शनिबार बिहान सोलुखुम्बुको लोबुचेमा ९एन–एएनजे कलसाइनको हेलिकोप्टर दुर्घटना भएको थियो । दुर्घटनामा गम्भीर घाइते भएका पाइलट सेढाईंलाई अर्को हेलिकोप्टरमार्फत उद्धार गरी काठमाडौंस्थित ह्याम्स अस्पतालमा ल्याइएको थियो । परिवारसित सरसल्लाहपश्चात् उनलाई भारत पठाइएको ह्याम्स अस्पतालले जनाएको छ ।

श्री एयरलाइन्सको विमानमार्फत शनिबार राति उनलाई भारत लगिएको सेफ्टी मेनेजर न्यौपानेले बताए ।

“शनिबार राति ९ः२१ बजे यहाँबाट ‘टेक अफ’ भएको हो,” उनले बाह्रखरीसित भने, “राति १२ः३० बजेतिर पुगेको हुनुपर्छ । श्री एयरलाइन्सबाट पठाइएको हो ।”

पाइलट सेढाईंको मुखको भाग, हातखुट्टालगायत ४५ देखि ५० प्रतिशत शरीर जलेको अवस्था छ । उनको फोक्सो र मेरुदण्डको हड्डी तथा किड्नीमा पनि समस्या रहेको ह्याम्स अस्पतालले जनाएको छ ।

“उहाँको उपचार इमरजेन्सी कक्षमा सुरु गरी भेन्टिलेटरमा राखेर उपचार गरिएको थियो । उहाँको मुखको भाग, हातखुट्टालगायत ४५ देखि ५० प्रतिशत शरीर जलेको अवस्था छ । साथै, उहाँको फोक्सो र मेरुदण्डको हड्डी तथा किड्नीमा पनि समस्या छ,” शनिबार बेलुका सो अस्पतालले जारी गरेको विज्ञप्तिमा उल्लेख छ, “उहाँको शरीर र हातको उपचारको लागि अपरेसन कक्षमा डेब्रिडमेन्ट र इस्काराक्टोमी गरी उपचार भएको छ ।”

सेफ्टी मेनेजर न्यौपानेका अनुसार मुम्बईमा विशेषज्ञ चिकित्सकसहितको टोलीले उपचार गर्नेछ । दुर्घटनाका समयमा उक्त हेलिकोप्टरमा पाइलट सेढाईं मात्र सवार रहेको मनाङ एयरले जनाएको छ ।