काठमाडौं । सान मारिनोका रक्षक रोबर्टो डी माइओका लागि ४० वर्षमा फुटबल करियरको सुरुआत भएको छ । 

व्यावसायिक फुटबलमा यस्तो घटना कमैमात्र सुन्न पाइन्छ । उमेरले ३५ कटेपछि अधिकांश फुटबलर सन्यासको सोचमा हुन्छन् । तर, विश्व फुटबलको सबैभन्दा कमजोर टिममध्येको एक सान मारिनोका रक्षक माइओले भने ४० वर्षमा राष्ट्रिय टिमबाट ‘डेब्यू’ गरेर विश्वलाई चकित बनाएका छन् ।

माइओले गत मार्चमा नर्दन आयरल्यान्डविरुद्धको खेलबाट अन्तर्राष्ट्रिय फुटबलमा ‘डेब्यू’ गरेका हुन् । उनले युरो–२०२४ छनोटअन्तर्गतको खेलबाट ‘डेब्यू’ गरेका थिए । यूईएफए प्रतियोगिताबाट ‘डेब्यू’ गरेका माइओ त्यसबेला ४० वर्ष १९३ दिनका थिए ।

उक्त खेलमा सान मारिनो नर्दन आयरल्यान्डसँग २–० ले पराजित भयो । विश्व वरियताको २०७औँ स्थानमा रहेको सान मारिनोका लागि यो नतिजा अप्रत्यासित थिएन । सान मारिनोले अन्तर्राष्ट्रिय फुटबलमा पछिल्लो १३२ खेलयता जित निकाल्न सकेको छैन ।

सान मारिनोले शनिबार पुनः नर्दन आयरल्यान्डविरुद्ध खेल्दै छ । माइओ उक्त खेलका लागि पनि टिममा समेटिएका छन् । यी दुईबीचको खेल विन्डसोर पार्कमा हुनेछ । 

“सान मारिनोबाट खेल्न पाउँदा म निक्कै गौरवान्बित छु । यो ती खेलहरू मध्ये एक थियो जहाँ मैले आफैलाई मानसिक रूपमा सबल बनाउनु परेको थिएन । मेरो स्वास्थ्य स्थिती उच्चस्तरको थियो । म दुई घण्टासम्म नथाक्ने थिए,” उनले भने, “सायद केही मानिसहरूले ‘पृथ्वीमा के गर्दै हुनुहुन्छ, यी खोलडी सबै खेल हार्ने सान मारियनोबाट खेल्दैछन्’ भन्ने सोच्न सक्छन् । तर जसले यसो भन्छ, उसलाई अन्तर्राष्ट्रिय फुटबल खेल्नुको अर्थ के हो थाहा छैन ।”