काठमाडौं । नेपाली राष्ट्रिय क्रिकेट टिमका बलर ललितनारायण राजवंशी आईसीसी ट्वान्टी–२० विश्वकपको एसिया क्षेत्रीय छनोटअघि नै मैदान फर्किने प्रवल सम्भावना देखिएको छ ।

यसै महिनाको सुरुआतमा दायाँ क्लाभिकल बोन (ब्युटिबोन)मा चोट लागेपछि ललितको शल्यक्रिया भएको थियो । असोज ४ गते प्रशिक्षणका दौरान ललित घाइते भएका थिए । त्यसयता क्यानको रेखदेखमा रहेका ललित विश्वकप छनोटअघि नै टिममा फर्किने प्रवल सम्भावना रहेको क्यानका डाक्टर अभिषेकराज सिंहले बताए । 

“ललित नेपाली टिमको एकदमै महत्वपूर्ण सदस्य हुन् र उनी इन्जर्ड भएदेखि नै हामी सबै चिन्तित छौँ । उनलाई बेस्ट ट्रिटमेन्ट कसरी दिन सकिन्छ भनेर क्यान म्यानेजमेन्ट अनि उपचारमा संलग्न टिम पूर्ण रूपले उपलब्ध साधन र स्रोतका माध्यमबाट प्रयास गरिरहेको छ । हाम्रो सुरुको दिनदेखिको प्रयास नै उनलाई छिटोभन्दा छिटो खेलमा फर्काउने नै हो । र, अहिलेको उनको प्रगति हेर्दा हामी हाम्रो लक्ष्य नजिक छौँ । आधिकारिक रूपमा ललितले आउँदो खेल खेल्ने नखेल्ने भन्ने बारेमा भने क्यानले नै बताउने छ,” डा. सिंहले बाह्रखरीसँग भने । 

विश्वकप छनोटअघिको त्रिदेशीय शृंखलाबाट नियमित स्पिनर सन्दीप लामिछानेले नाम फिर्ता लिएपछि नेपाली टिममा नियमित स्पिनरको समस्या हुने देखिएको छ । यसै कारण पनि ललितको पुनरागमन टिमका लागि महत्वपूर्ण रहेको जानकार बताउँछन् ।