काठमाडौं । नेपाल धितोपत्र बोर्डमा छुट्टाछुट्टै समूहका पाँच कम्पनीले आईपीओ निष्कासन गर्न निवेदन दिएका छन् । 

एसवाई प्यानल, जगदम्बा स्टिल्स, माविलुङ इनर्जी लिमिटेड, एपेक्स हस्पिटालिटी र याम्बालिङ हाइड्रोपावरले आईपीओ निष्कासन गर्न बोर्डमा निवेदन दिएका हुन् ।

यी पाँच कम्पनीमध्ये जगदम्बा स्टिलले अंकित मूल्य १०० रुपैयाँमा प्रिमियम मूल्य २०० थप गरी प्रतिकित्ता ३०० रुपैयाँमा आईपीओ निष्कासन गर्न लागेको हो । यो कम्पनीले असोज १७ गते बोर्डमा निवेदन दिएको हो । दुई करोड ७० हजार कित्ता आईपीओ ६ अर्ब दुई करोड १० लाख रुपैयाँ बराबरमा निष्कासन गर्न बोर्डमा निवेदन दिएको हो । यो कम्पनीको बिक्री प्रबन्धक सिद्धार्थ क्यापिटल लिमिटेड छ ।

'अन्य' समूह अन्तर्गतको एसवाई प्यानलले अंकित मूल्य १०० मा नै ५२ लाख ३२ हजार ५४८ कित्ता आईपीओ निष्कासन गर्न असोज १९ गते बोर्डमा निवेदन दिएको हो । यो कम्पनीको आईपीओ निष्कासन तथा बिक्री प्रबन्धक प्रभु क्यापिटल लिमिटेड छ ।

याम्बालिङ हाइड्रोपावर अंकित मूल्य १०० रुपैयाँमा नै २८ लाख कित्ता आईपीओ निष्कासन गर्न असोज १० गते बोर्डमा निवेदन दिएको हो । यो कम्पनीको आईपीओ निष्कासन तथा बिक्री प्रबन्धक मुक्तिनाथ क्यापिटल लिमिटेड छ ।

त्यसैगरी एपेक्स हस्पिटालिटीले पनि अंकित मूल्य १०० रुपैयाँमा नै २४ लाख कित्ता आईपीओ निष्कासन गर्न असोज १२ गते निवेदन दिएको हो । कम्पनीको आईपीओ निष्कासन तथा बिक्री प्रबन्धक हिमालयन क्यापिटल लिमिटेड छ ।

माविलुङ इनर्जीले पनि अंकित मूल्यमा नै १८ लाख ९० हजार ५३० कित्ता आईपीओ निष्कासन गर्न असोज १४ गते बोर्डमा निवेदन दिएको हो । यो कम्पनीको आईपीओ निष्कासन तथा बिक्री प्रबन्धक लक्ष्मी क्यापिटल मार्केट लिमिटेड छ ।

यी कम्पनीमध्ये हाइड्रो समूहका याम्बालिङ्ग हाइड्रोपावर र मबिलुङले बोर्डबाट अनुमति पाएपछि पहिलो चरणमा आयोजना प्रभावित स्थानीय र वैदेशिक रोजगारीमा गएकालाई आईपीओ निष्कासन गरी दोस्रो चरणमा सर्वसाधारणलाई निष्कासन गर्नेछन् । अन्य र उत्पादन तथा प्रशोधन समूहअन्तर्गतका तीन कम्पनीले भने वैदेशिक रोजगारीमा गएका नेपालीलाई आईपीओ निष्कासन गरेर मात्र सर्वसाधारणलाई निष्कासन गर्नेछन् ।