काठमाडौं । मिर्मिरे लघुवित्त वित्तीय संस्था लिमिटेडले आजदेखि थप सार्वजनिक निष्कासन (एफपीओ) निष्कासन गर्ने भएको छ ।

आईपीओ जारी गरिसकेको कम्पनीले सर्वसाधारणमा थप एफपीओ निष्कासन गर्न लागेको हो । कम्पनीले सर्वसाधारणतर्फको पुँजी संरचना ३० प्रतिशत कायम गर्न एफपीओ जारी गर्न लागेको हो ।

कम्पनीले प्रतिकित्ता १०० रुपैयाँ अंकित मूल्यमै एक करोड २३ लाख ८१ हजार ६४५ रुपैयाँ बराबरको एक लाख २३ हजार ८१६ दशमलव ४५ कित्ता एफपीओ निष्कासन गर्न लागेको हो ।

यो एफपीओ खरिदका लागि लगानीकर्ताहरूले असोज ३० गतेसम्म आवेदन दिन सक्नेछन् । सो अवधिसम्म माग बमोजिम आवेदन नपरे कात्तिक ९ गतेसम्म बिक्री लम्बिनेछ । एफपीओ खरिदका लागि न्यूनतम १० कित्तादेखि अधिकतम एक हजार कित्तासम्म माग गर्न सकिनेछ ।

कम्पनीको एफपीओ निष्कासन तथा बिक्री प्रबन्धकमा नेपाल एसबीआई मर्चेण्ट बैंकिंङ लिमिटेड छ । बिक्री प्रबन्धकसँगै नेपाल धितोपत्र बोर्डबाट अनुमति प्राप्त सम्पूर्ण आस्वा सदस्य बैंक तथा वित्तीय संस्था र तीनका सम्पूर्ण शाखा कार्यालयमार्फत आवेदन दिन सकिनेछ । साथै मेरो सेयरमार्फत पनि आवेदन दिन सकिनेछ ।

एफपीओ निष्कासनका लागि गराइएको रेटिङमा क्रेडिट रेटिङ संस्था इक्रा नेपालले वित्तीय दायित्व वहन गर्ने क्षमतामा मध्यम जोखिम रहेको संकेत गर्ने इक्रा एनपी इस्यूअर रेटिङ डबल बी माइनस प्रदान गरेको छ ।

कम्पनीको अधिकृत पुँजी ७५ करोड रुपैयाँ रहेको छ । जारी पूँजी ६६ करोड ५७ लाख ६४ हजार रुपैयाँ छ । एफपीओ निष्कासन तथा बाँडफाँटपछि कम्पनीको चुक्तापुँजी ६६ करोड ५७ लाख ६४ हजार रुपैयाँभन्दा बढी कायम हुनेछ ।

एफपीओपछि कम्पनीको कुल चुक्ता पूँजीमा संस्थापकतर्फ ७० प्रतिशत र सर्वसाधारणतर्फ ३० प्रतिशत सेयर स्वामित्व कायम हुनेछ ।