काठमाडौं । राष्ट्रियसभाका अध्यक्ष गणेशप्रसाद तिमिल्सिनाले इजरायल घटनाले आफू स्तब्ध बनेको बताएका छन् । सोमबार विज्ञप्ति जारी गर्दै उनले प्यालेस्टाइनी अतिवादी समूह हमासको आक्रमणमा परी १० नेपाली विद्यार्थीको मृत्यु भएको घटनाप्रति दुःख व्यक्त गरेका छन् ।
उनले दिवंगत नेपाली विद्यार्थीप्रति श्रद्धाञ्जली व्यक्त गरेका छन् । शोकाकुल परिवारजनमा गहिरो समवेदना प्रकट गरेका छन् ।
“अतिवादी हमास समूहको आक्रमणमा परी १० जना नेपाली विद्यार्थीहरूको दुःखद निधनको पीडादायी खबरले स्तब्ध बनायो । आक्रमणमा परी कैयौँ नेपाली घाइते हुनुभएको छ,” उनले विज्ञप्तिमा लेखेका छन्, “शोकको यस घडीमा दिवंगत हुनुभएकाहरूप्रति भावपूर्ण श्रद्धाञ्जली अर्पण गर्दछु । शोकाकुल परिवारजनमा गहिरो समवेदना प्रकट गर्दछु ।”
उनले घाइतेहरूको शीघ्र स्वास्थ्यलाभको कामना गरेका छन् । इजरायलमा रहेका नेपालीको उद्धार, राहतको व्यवस्था मिलाउन अध्यक्ष तिमिल्सिनाले नेपाल सरकारसमक्ष आग्रह गरेका छन् ।
“घाइतेहरूको शीघ्र स्वास्थ्यलाभको कामनाका साथ इजरायलमा रहेका नेपालीहरूको उघार, राहत र नेपाल फर्कन चाहनेहरूलाई शीघ्र नेपाल फर्काउने सम्पूर्ण व्यवस्था मिलाउन नेपाल सरकारसमक्ष विशेष अनुरोध गर्दछु,” उनले भनेका छन् ।
