काठमाडौं । नेकपा (एमाले)का सचिव लेखराज भट्टले दशौँ महाधिवेशनको कार्यदिशालाई आत्मसाथ गरे मात्रै प्रदेश अधिवेशन सफल हुने बताएका छन् । सुदूरपश्चिम प्रदेशको अधिवेशनको उद्घाटन सत्रमा उनले अधिवेशनलाई एकतामा रुपान्तरण गर्नुपर्ने बताए ।
“अधिवेशन तब मात्र सफल हुन्छ, जब दशौँ महाधिवेशनको कार्यदिशा र रणनीतिलाई गहिरोसँग आत्मसाथ गर्छौँ । यो अधिवेशन त्यतिबेला सफल हुन्छ, जब एकतामा रुपान्तरण गर्न सक्छौँ,” उनले भने ।
भट्टले आफूले भनेको मात्रै सर्वसम्मत भन्ने प्रवृत्तिको समीक्षा गर्नुपर्ने बताए । “सर्वसम्मत भनिरहेका छौँ । मैले भनेको कुरा मानेपछि सर्वसम्मत, अर्काले भनेको सर्वसम्मत नुहने । त्यो प्रवृत्तिलाई हामीले समीक्षा गर्नुपर्छ,” उनले भने ।
उनले पार्टी अध्यक्ष केपी शर्मा ओलीलाई समग्र नेतृत्वको रुपमा बुझेको बताए । ओलीले माथिबाट हेरेर सबैलाई समेटेर लैजाने उनले विश्वास व्यक्त गरे ।