काठमाडौं । राष्ट्रिय स्वतन्त्र पार्टी (रास्वपा)का सांसद डा. स्वर्णिम वाग्लेले बजेट वक्तव्यमा दफा २९ देखि ५२ सम्म धेरै कार्य महिना तोकेर सम्पन्न गर्ने भनिए पनि सरकारले ती काम नगरेको बताएका छन् ।

आइतबार प्रतिनिधिसभा बैठकमा उनले योपटक पनि साढे ३ प्रतिशतभन्दा बढी आर्थिक वृद्धि नहुने विभिन्न सर्वेक्षण र प्रक्षेपणले देखाएको उल्लेख गरे ।

“कतिपय काम असारसम्म, केही काम साउनसम्म, केही काम असोज–कात्तिक विभिन्न म्याद तोकिएको थियो । हामीले अर्थमन्त्रीलाई शंकाको लाभ दिएकै हो, तर स्प्रीडअनुसार काम भएको छैन,” उनले भने ।

सांसद वाग्लेले अर्थतन्त्रको विषम परिस्थितिमा नेपाल राष्ट्र बैंकले नीति खुकुलो गरेको भन्दै प्रशंसा गरे ।

उनले तनहुँ जिल्ला डेंगीले आक्रान्त भएको भन्दै त्यसका निम्ति आधारभूत सामग्री व्यक्तिगत पहलमा पठाउनुपर्ने अवस्था आएको गुनासो गरे । विदेशबाट फर्कने नेपालीमा किड्नीको समस्या हुने गरेको भन्दै उनले यसतर्फ सरकारको ध्यानाकर्षण गराए ।