काठमाडौं । प्रधानमन्त्री पुष्पकमल दाहाल ‘प्रचण्ड’ले परराष्ट्रमन्त्री एनपी साउदको संयोजकत्वमा समन्वय संयन्त्र स्थापना गरेका छन् । प्यालेस्टाइनी चरमपन्थी समूह हमास र इजरायलबीच युद्ध चर्किरहेका बेला अवस्थाको अनुगमन र मूल्यांकन गर्न संयन्त्र स्थापना गरिएको हो ।

“आज (आइतबार) बिहान प्रधानमन्त्रीज्यूको अध्यक्षतामा बैठक बसी परराष्ट्रमन्त्रीको संयोजकत्वमा सबै सरोकारवाला निकायहरू सम्मिलित एक समन्वय संयन्त्र स्थापना गरिएको छ,” परराष्ट्रमन्त्री साउदले प्रतिनिधिसभा बैठकमा भने ।

संयन्त्रले घटनाको अनुगमन गर्नेदेखि इजरायलबाट नेपालीको उद्धार गर्नुपरेमा आवश्यक तयारी गर्ने जनाइएको छ ।

“यस संयन्त्रले घटनाको निरन्तर अनुगमन र वस्तुस्थितिको समग्र मूल्यांकन गरेर नेपालीहरूको अवस्था पहिचान गर्ने, उद्धार गर्नुपर्ने अवस्थामा उक्त कार्य समेत गर्नको लागि आवश्यक निर्णय लिने, समन्वय तथा सहयोग गर्नेलगायत सम्पूर्ण कार्यहरू गर्नेछ,” उनले भने ।

परराष्ट्रमन्त्री साउदले इजरायलमा हाल चार हजार ५०० नेपाली केयरगिभरका रूपमा कार्यरत रहेको बताए । त्यहाँ हाल अध्ययन गरिरहेका २६५ नेपाली विद्यार्थी इजरायल सरकारको ‘लर्न एन्ड अर्न’ कार्यक्रमअन्तर्गत गएको उनले जनाए ।

अध्ययनका निम्ति गएका मध्ये नेपालको कृषि विश्वविद्यालयबाट ११९, त्रिभुवन विश्वविद्यालयबाट ९७ र सुदूरपश्चिम विश्वविद्यालयबाट ४९ जना छन् ।

सुदूरपश्चिम विश्वविद्यालयबाट गएका ४९ मध्ये १७ नेपाली दक्षिण इजरायलको किवुज अलुमिम भन्ने स्थानमा अध्ययनरत थिए ।

“नेपाली राजदूतावासमा प्राप्त अपडेटअनुसार यो स्थान (किवुज अलुमिम) गाजा क्षेत्रनजिक रहेको र त्यहाँ हमास समूहबाट गम्भीर आक्रमण भएकोले उक्त स्थानमा अध्ययनका लागि रहेका १७ जना नेपालीमध्ये दुईजना सकुशल रहेको, तीनजना घाइतेको उपचार स्थानीय अस्पतालमा भइरहेको छ । बाँकी १२ जनामध्ये केही सम्पर्कमा नरहेको र केही हताहत भएको हुन सक्ने हुँदा स्थिति यकिन गर्न सम्पूर्ण संयन्त्र परिचालन गरिएको छ,” उनले भने ।

हमासले शनिबार अचानक इजरायलमा आक्रमण गरेको थियो ।