काठमाडौं । नेपालबाट यो वर्षको मनसुन बाहिरिन थालेको छ । सुदूरपश्चिम र कर्णाली प्रदेशको पश्चिम भू–भागबाट मनसुन बाहिरिन सुरु भएको हो । 

शुक्रबार सुदूरपश्चिम र कर्णाली प्रदेशको पश्चिम भू–भागबाट मनसुन बाहिरिएको जल तथा मौसम विज्ञान विभागले जनाएको छ ।
 
नेपालको बाँकी भू–भागबाट पनि केही दिनमा मनसुन बाहिरिने सम्भावना रहेको विभागले बताएको छ । “हिजोबाट मनसुन बाहिरिन सुरु भएको छ । पश्चिमबाट क्रमशः मनसुन पूर्वतर्फ सरिरहेको छ,” मौसमविद् सञ्जिव अधिकारी बाह्रखरीसँग भन्छन्, “पश्चिमबाट पूर्वतर्फ सर्दै नेपालबाट मनसुन बाहिरिने हो ।” 

आज कोसी, मधेस, वाग्मती, गण्डकी र लुम्बिनी प्रदेशका केही भू–भागमा वर्षा भइरहेकाले आजै यी क्षेत्रबाट मनसुन बाहिरिने सम्भावना नरहेको उनी बताउँछन् । “आज लुम्बिनी प्रदेशबाट पनि मनसुन बाहिरिने सम्भावना छैन किन भने लुम्बिनीका भू–भागमा वर्षा भइरहेको छ,” मौसमविद् अधिकारीले भने । 

• बाहिरिन सुरु भयो नेपालबाट मनसुन 

मनसुन बाहिरिन सुरु भए पनि कति दिनभित्र बाहिरिसक्छ भन्ने यकिन नरहेको उनको भनाइ छ । “मनसुन बाहिरिन सुरु भएको एकदुई दिनभित्रै पनि पूर्ण रूपमा बाहिरिन्छ, एक हप्ता पनि लाग्छ सक्छ, त्यसैले यति दिनभित्रै नेपालबाट मनसुन बाहिरिन्छ भन्ने हुँदैन,” उनी स्पष्ट पार्छन् । 

सुदूरपश्चिमबाट सुरु भएको मनसुनी प्रणाली कोसी प्रदेशबाट पनि बाहिरिएपछि नेपालबाट मनसुन पूर्णरूपमा बाहिरिने अधिकारी बताउँछन् । 

नेपालबाट मनसुन बाहिरिने औसत मिति अक्टोबर २ हो । यो वर्ष पनि केही दिन ढिलोबाट मनसुन बाहिरिन सुरु भएको हो । 

यो वर्ष जेठ १३ गते नेपालमा मनसुन भित्रिएको थियो । नेपालमा मनसुन भित्रिने औसत मिति जुन १३ (जेठ ३०) हो ।