काठमाडौं । भूमि व्यवस्था तथा सहकारीमन्त्री रञ्जिता श्रेष्ठले सरकारले संविधान दिवसको अवसरमा कैदीलाई आममाफी नदिएको बताएकी छन् । मंगलबार संसद् भवनबाहिर सञ्चारकर्मीसँग कुरा गर्दै उनले सरकारले आममाफी नभएर कैद कट्टा मात्रै गरेको बताइन् ।

आफूहरुले अपराधी राजनीतिक तवरबाट छुट्नुपर्छ नभनेको भन्दै उनले यसपटक कसैलाई आममाफी नदिइएको र कैद कट्टा गरेर छुटाइएको बताइन् । कैद कट्टा गरेर छुटाउनु र आममाफी दिनु फरक भएको उनले जिकिर गरिन् ।

“आममाफी एउटा छुट्टै कुरा हो । अदालतबाट दोषी ठहर भएकालाई पनि आम माफी दिने भन्ने कुरा छ । र, अहिलेको केसमा आममाफी नै दिइएको छैन,” उनले भनिन्, “किनभने, यो त कैद कट्टा गरिएको हो । कैद कट्टा गरेर छुटाइएको हो । हामीले क्याबिनेट बैठक बस्दा पनि त्यो भनेको छैन । अपराधीलाई राजनीतिक तवरबाट छुट्नुपर्छ भनेका छैनौँ । कारागारमा गइसकेपछि आफूले भोग्ने कानुनअनुसार भोग्नुपर्छ । यसपटक कसैलाई आममाफी दिइएको छैन । नबुझेको हो । कैद कट्टा हो ।”