काठमाडौं । चीनको हाङझाउमा जारी १९औँ एसियाली खेलकुदअन्तर्गत पुरुष क्रिकेटमा भारतसँग नेपाल २३ रनले पराजित भएको छ । हारसँगै नेपाल पुरुष क्रिकेटको क्वार्टरफाइनलबाटै बाहिरिएको छ ।

मंगलबार जेझाङ प्राविधिक विश्वविद्यालयको क्रिकेट मैदानमा भारतीय टिमले २०३ रनको लक्ष्य प्रस्तुत गरेको थियो । जवाफमा नेपालले निर्धारित २० ओभरमा नौ विकेट गुमाएर १७९ रन मात्र बनाउन सक्यो ।

नेपालका दीपेन्द्रसिंह ऐरीले १५ बलमा चार छक्कासहित ३२ रन बनाए पनि हार टार्न सकेनन् । सन्दीप जोराले १२ बलमा तीन छक्का र एक चौकासहित २९ रन बनाए । कुशल मल्लले २२ बलमा दुई चौका र दुई छक्कासहित २९ रनको योगदान गरे ।

ओपनर कुशल भुर्तेलले २८ र आसिफ शेखले १० रन बनाए । सोमपाल कामीले सात, गुल्सन झाले ६ र कप्तान रोहितकुमार पौडेलले तीन रन जोडे ।

भारतका रवि बिस्नोइ र आवेश खानले समान तीन विकेट लिए । अर्शदीप सिंहले दुई र साई किशोरले एक विकेट लिए ।

त्यसअघि, टस जितेर ब्याटिङमा उत्रिएको भारतीय टिमले यशस्वी जयसवालको शतकको मद्दतमा निर्धारित २० ओभरमा चार विकेट गुमाएर २०२ रन बनाएको थियो ।

यशस्वी ४९ बलमा आठ चौका र सात छक्कासहित १०० रन बनाएर आउट भए । ट्वान्टी–२० क्रिकेटमा यशस्वीको यो अहिलेसम्मकै उच्च स्कोर हो ।

यशस्वीले पहिलो विकेटका निम्ति कप्तान रितुराज गाइकवाडसँग ९.५ ओभरमा १०३ रनको साझेदारी गर्दै भारतलाई उत्कृष्ट सुरुआत दिलाएका थिए । गाइकवाडले २५ रन बनाए ।

रिंकु सिंहले ३७ र सिवम दुवे २५ रनमा अविजित रहे । यी दुईले पाँचौँ विकेटका निम्ति ५२ रनको साझेदारी गर्दै भारतलाई बलियो योगफलसम्म पुर्‍याएका हुन् ।

बलिङतर्फ दीपेन्द्रसिंह ऐरीले दुई विकेट लिए । चार ओभर बलिङ गरेका दीपेन्द्रले ३१ रन खर्चिए । सोमपाल कामी र सन्दीप लामिछानेले समान एक विकेट लिए ।

पुरुष क्रिकेटमा नेपाल समूह ‘ए’को विजेता बन्दै क्वार्टरफाइनलमा पुगेको थियो । नेपालले समूह चरणका खेलमा मंगोलियालाई २७३ र माल्दिभ्सलाई १३८ रनले हराएको थियो ।

भारतले भने आईसीसीको वरीयताअनुसार सोझै क्वार्टरफाइनलमा प्रतिस्पर्धा गर्ने अवसर पाएको थियो ।