काठमाडौं । त्रिभुवन अन्तर्राष्ट्रिय विमानस्थलबाट राजस्व अनुसन्धान विभागले ६१ किलो सुन बरामद गरेसँगै नेपालमा हुँदै आएको सुन तस्करीका घटनाहरु उजागर हुन थाले । पटकपटक तस्करीको सुन समातिएपछि विमानस्थलमा सुरक्षा कडा बनाइयो । तर, सुन तस्करी रोकिएन । दिनदिनै किलोका किलो सुन बरामद भइरहेको छ ।

दोलखाको उत्तरी नाका लामाबगरबाट मात्रै पाँच दिनको अवधिमा ११ किलो सुन बरामद भएको छ । बुधबार र शनिबार सात किलो सुन बरामद गरेको प्रहरीले आइतबार त्यहाँबाट थप चार किलो सुन बरामद गरेको छ ।

प्रहरीले लामाबगरस्थित बारीमा लुकाएर राखेको अवस्थामा सुन बरामद गरेको हो । सुन कसले र कहाँबाट ल्याएर राखेको भन्नेबारेमा थप अनुसन्धान भइरहेको प्रहरीले जनाएको छ । उक्त सुन प्रकरणमा जोडिएका सातजनालाई प्रहरीले पक्राउ गरेको छ ।

पक्राउ पर्नेमा दोलखा बिगु–१ का राज तामाङ, २८ वर्षीय केशर तामाङ, २० वर्षीय माधव मगर, १९ वर्षीय पेम्बा तामाङ, ५५ वर्षीय नुर्वु छिरिङ शेर्पा, ३० वर्षीया सुनमाला तामाङ र चसमान तामाङ छन् । उनीहरुमाथि दोलखा प्रहरीले संगठित अपराध मुद्दामा अनुसन्धान जारी राखेको छ ।

शनिबार मात्रै प्रहरीले रसुवाबाट एक किलो सुनसहित दुईजनालाई पक्राउ गरेको छ । रसुवाको बेत्रावतीबाट विशाल तामाङसहित दुईजना पक्राउ परेका हुन् । रसुवाबाट पक्राउ परेका विशाल तामाङलाई सीआईबीको टोलीले आईतबार त्रिभुवन विमानस्थल भन्सार कार्यालयमा बुझाएको छ ।

चीनसँग सीमा जोडिएको दोलखा र रसुवाबाट सुनसहित मानिस पक्राउ पर्न थालेपछि सीआईबीको टोली रसुवा र दोलखा पुगेको छ । प्रहरीको अनुुसन्धानले विमानस्थलमा सुरक्षा व्यवस्था कडा हुन थालेपछि सुन तस्करले स्थलमार्ग हुँदै तस्करी गर्न थालेका हुन् । त्यसको लागि उनीहरुले रसुवाको टिमुरे र केही दिन अघिमात्रै खुलेको दोलखाको लामाबगर नाका प्रयोग गर्न थालेका प्रहरीको दाबी छ ।

ती ठाउँबाट भइरहेको सुन तस्करीमा पनि ६० किलो सुन भित्र्याउने समूह नै सक्रिय रहेको र विमानस्थलको प्रयोग नगरी स्थलमार्ग हुँदै तस्करी गर्न थालेको आशंका सीआईबीको छ । ६० किलो सुन तस्करीका लगानीकर्ताले हङकङमा बसेर तस्करी गर्ने गरेको सीआईबीको अनुसन्धानले देखाएको थियो ।

सीआईबीका प्रवक्ता एसपी नवराज अधिकारीले दोलखामा बरामद भएको सुन तस्करीको अनुसन्धान जारी रहेको बताए । उनका अनुसार दोलखामा भेटिएको सुन तस्करीको अनुसन्धान गर्न प्रहरी निरीक्षकको कमान्डमा सीआईबीको टोली दोलखा पुगेको छ ।

राजस्व अनुसन्धान विभागले २ साउनमा बरामद गरेको ६१ किलो सुनको मुद्दा विचाराधीन अवस्थामा छ । उक्त सुन तस्करीबारे प्रहरीको केन्द्रीय अनुसन्धान ब्युरो (सीआईबी)ले संगठित अपराध मुद्दामा अनुसन्धान गरेको थियो ।

६० दिन अनुुसन्धान गरेको सीआईबीको प्रतिवेदनका आधारमा ३१ भदौमा जिल्ला सरकारी वकिल कार्यालयले उक्त मुद्दा अदालत टेकाएको थियो । सातजना चिनियाँसहित २९ जना प्रतिवादी बनाइएको उक्त मुद्दाबारे हाल जिल्ला अदालत काठमाडौंले आरोपीको बयान लिने काम गरिरहेको छ ।

प्रहरीको अनुसन्धानले सुन तस्करीमा चिनियाँ नागरिक याहो पुचिङसहित तिब्बती मूलका बेल्जियन नागरिक दावा छिरिङ मुख्य योजनाकार रहेको निष्कर्ष निकालेको थियो ।

यस्तै, विद्युतीय सिगरेट भेपमार्फत भएको नौ किलो सुन तस्करीको अनुसन्धान अझै सीआईबीले जारी राखेको छ । सो सुन तस्करी प्रकरणमा पूर्वसभामुख कृष्णबहादुर महराका छोरा राहुल महरा पक्राउ परेका थिए । १३ भदौँमा पक्राउ परेका उनीमाथि अझै अनुसन्धान जारी छ ।

त्यस्तै, त्रिभुवन विमानस्थलबाट ६० किलोपछि थप तीन किलो सुन बरामद भएको विमानस्थल प्रहरी कार्यालयका एसपी पदम विष्टले जानकारी दिए । शुक्रबार मात्रै विमानस्थलबाट दुई केजी ७२० ग्राम सुनसहित फिलिपिन्सकी नागरिक ३० वर्षीया अरिबिक अरोन्स पक्राउ परेकी थिइन् । उनीमाथि प्रहरी वृत्त गौशलाले अनुसन्धान जारी राखेको छ ।