काठमाडौं । चीनको हाङझाउमा जारी १९औँ एसियाली खेलकुदको महिला फुटबलतर्फ नेपाल जितविहीन बनेको छ ।

बिहीबार समूह ‘डी’ को आफ्नो अन्तिम खेलमा बंगलादेशसँग १–१ को बराबरीमा रोकिएपछि नेपाल जितविहीन हुँदै प्रतियोगिताबाट बाहिरिएको हो । 

वेनझेउ स्पोर्ट्स सेन्टर रंगशालामा सम्पन्न खेलमा बंगलादेशकी कप्तान सविना खातुनले गोल गर्दै अग्रता दिलाएकी थिइन् । 

खातुनले पहिलो हाफका लागि एक मिनेट बाँकी रहँदा पेनाल्टी बक्सबाहिरबाट गरेको प्रहार नेपाली गोलकिपर एन्जिला तुम्बाप्पो सुब्बाले रोक्न सकिनन् ।

तर, खेलको निर्धारित समय सकिन सात मिनेट बाँकी रहँदा रेखा पौडेलले गोल गर्दै नेपालको हार टारेकी थिइन् । रेखाले ८३औँ मिनेटमा गोल गर्दै नेपाललाई खेलमा फर्काएकी हुन् । सावित्रा भण्डारीको क्रसमा १८ यार्ड बक्सभित्र रहेकी रेखाले हेडर गोल गर्दै नेपालको हार टारेकी थिइन् ।

नेपाल यसअघि एसियाडको पहिलो खेलमा भियतनामसँग २–० ले पराजित भएको थियो । दोस्रो खेलमा जापानसँग ८–० को फराकिलो हार व्यहोरेको थियो । यता, बंगलादेश भने पहिलो खेलमा जापानसँग ८–० ले र दोस्रो खेलमा भियतनामसँग ६–१ ले पराजित भएको थियो ।