काठमाडौं । नेकपा (एमाले) कर्णाली प्रदेश अधिवेशनको बन्द सत्र अझै सुरु हुन सकेको छैन । सुर्खेतको सिटी हलमा बिहान ८ बजेबाट बन्द सत्र सुरु गर्ने तयारी थियो । 

तर, आन्तरिक तयारीका कारण समय ढिलो भएको उपाध्यक्ष लालबहादुर महतराले जानकारी दिए । अहिले भने महासचिव शंकर पोखरेलले स्थायी कमिटी सदस्यहरूसँग छलफल गरिरहेका छन् । 

नेतृत्व चयनका विषयमा उनीहरू छलफलमा जुटेकाले बन्द सत्र सुरु हुन नसकेको एक नेताले जानकारी दिए । कर्णालीमा यामलाल कँडेल, गोरखबहादुर बोगटी स्थायी कमिटी सदस्य छन् । उनीहरूले प्यानलै बनाउन लागेको नेताहरू बताउँछन् । 

कर्णाली प्रदेशको अध्यक्षका लागि पोलिट्ब्यूरो सदस्य गुलाबजंग शाह, प्रदेश कमिटी उपाध्यक्ष लालबहादुर महतरा, नेताहरू मीनबहादुर शाही र राजबहादुर शाही आकांक्षी देखिएका छन् । 

कर्णालीमा १३५ सदस्यीय कमिटी निर्वाचित हुनेछ । अधिवेशनमा ६०४ प्रतिनिधि छन् ।