![नेपाललाई पेनाल्टी सुटआउटमा हराउँदै भारत फाइनलमा](https://12khari.top/uploads/posts/Nepal-vs-India-1695818759.jpg)
काठमाडौं । घरेलु टिम नेपाललाई पेनाल्टी सुटआउटमा हराउँदै साविक विजेता भारत साफ यू–१९ च्याम्पियनसिपको फाइनलमा प्रवेश गरेको छ ।
भारतले पेनाल्टीमा ३–२ ले बाजि मार्दै फाइनलको यात्रा तय गरेको हो ।
त्रिपुरेश्वरस्थित दशरथ रंगशालामा सम्पन्न खेलको निर्धारित समय १–१ को बराबरीमा समाप्त भएपछि खेलको निर्णय पेनाल्टी सुटआउटबाट भएको हो ।
निर्धारित समयको खेलमा साहील खुर्सिदले गोल गर्दै भारतलाई अग्रता दिलाएका थिए । खुर्सिदले २६औँ मिनेटमा गोल गर्दै भारतलाई अग्रतामा राखेका थिए ।
तर, ७४औँ मिनेटमा समीर तामाङले गोल गर्दै नेपाललाई खेलमा फर्काएका थिए । दीपक थापामगरले निकालेको क्रसमा बक्सभित्र रहेका समिरले हेडर गोल गर्दै नेपाललाई बराबरीमा फर्काएका थिए । यसपछि थप गोल हुन नसक्दा खेल पेनाल्टीमा पुगेको हो ।
त्यसअघि ४७औँ मिनेटमा निराजन धामीको प्रहार पोस्टमा लागेर फर्किंदा नेपालले बराबरीको मौका गुमाएको थियो ।
नेपालबाट आश्विन घोरासैनी र कुशल देउवाले गोल गरे । नेपालका प्रशान्त लक्षमको प्रहार भारतका गोलकिपर लियोनल डार्यलले बचाएका थिए । यस्तै, लछु थापाको प्रहार बारमा लागेर फर्किदा विक्रम तामाङको प्रहार आकासिएको थियो ।
भारतका अर्जुन सिंह ओइनाम, ग्वग्वम्सर गोयरी र मङ्लेन्ताङ किप्गेनले गोल गरे ।
भारतका दिनेश सिंह सोउबम र रिकी मैतेई हाओबमको प्रहार नेपालका गोलकिपर जियारथ सेखले बचाए पनि मैदानमा उपस्थित १२ हजार ६५६ दर्शकमाझ हार टार्न भने सकेनन् ।
जितसँगै भारतले अब उपाधिका लागि पाकिस्तानसँग खेल्ने भएको छ । पाकिस्तानले आजै भएको पहिलो सेमिफाइनलमा भुटानलाई पेनाल्टी सुटआउटमा हराउँदै फाइनलमा स्थान बनाएको थियो ।
प्रतियोगितामा नेपाल समूह 'ए' को उपविजेता र भारत समूह 'बी' को विजेताको रूपमा सेमिफाइनल आएका हुन् । समूह चरणमा नेपालले पाकिस्तानसँग १–० को हार बेहोर्दा माल्दिभ्सलाई भने ४–१ ले हराएको थियो । भारतले भने समूहको पहिलो खेलमा बंगलादेशलाई ३–० ले र दोस्रो खेलमा भुटानलाई २–१ ले हराएको थियो ।