काठमाडौं । काठमाडौं महानगरपालिकाका मेयर बालेन शाहले आफूले चुनावी वाचा नभुलेको बताएका छन् । बुधबार सामाजिक सञ्जालमार्फत महानगरविरुद्ध उभिएर आन्दोलन गरिरहेका सामाजिक अभियन्ता ई:लाई सम्बोधन गर्दै बालेनले आफूले चुनावी एजेन्डा नबिर्सिएको र गरिबको सधैँका लागि बोल्दिने महानगर भएको बताएका छन् । 

"घोषणापत्रको कुन पेजको कुन बुँदामा लेखेको छु भन्ने पनि थाहा छ । त्यो बुँदा कुनै अमूक व्यक्ति वा समूहको व्यवस्थापनका लागि मात्र थिएन, त्यो गरिबी निर्मुल गर्ने एउटा चरणको रूपमा थियो । महानगरको सीमितता र सम्भावना दुवैको प्रत्यक्ष अध्ययनबाट केही कार्यक्रमहरू थप परिस्कृत गरिएका हुन् । अहिले पनि भन्छौँ, संसारैबाट गरिबी हटाउने हो, गरिब होइन," बालेनले भनेका छन् ।

उनले कानुनीसहित विभिन्न कारणले सडक व्यापारीका लागि स्थान तोक्न असम्भव रहेको तर्क गरेका छन् ।

बालेनले केपी ओली, बाबुराम भट्टराई, कमल थापा, गगन थापा,  स्वर्णिम वाग्लेसहितको उपस्थिति र जायज मागहरू पूरा गर्नुपर्ने भन्ने तर्क 'राजनैतिक बेइमानी' रहेको पनि बताएका छन् । उनीहरूले सडक व्यापारबारे स्पष्ट नियम नै नबनाएको उनको आरोप छ ।

उनले ई:लाई आन्दोलन स्थगित गर्न पनि आग्रह गरेका छन् । 

"हाम्रो आग्रह छ, हजारौँ काठमाडौँबासीको घर भत्काएर, थातथलो उठाएर अधिग्रहण गरेर, हडपेर फुटपाथ र सडक बनाइएको ठाउँलाई व्यापार र व्यवसाय गर्न दिइनु ती मानिसहरूप्रतिको अन्याय मात्र होइन, जुन प्रयोजनका लागि अधिग्रहण गरिएको हो, त्यो भन्दा अलग्गै प्रयोजनका लागि प्रयोग गर्न नपाइने कानुनको समेत बर्खिलाप हुन जान्छ । यसैले कृपया, आन्दोलन बन्द गरेर नियम कानुनको पालना गर्नु र गराउन भनिदिनुहोला । हामीले कानुनको पालना गर्दा वा गराउँदा अवरोध नगरिदिनुहोला," उनले भनेका छन् ।