काठमाडौं । धनगढी एफसीले नेपाल सुपर लिग (एनएसएल) को दोस्रो संस्करणका लागि राष्ट्रिय टिमका मिडफिल्डर आशिष चौधरीलाई मार्की खेलाडीको अनुबन्ध गरेको छ ।

‘गो ड्रिमर्स’ को स्वामित्वमा रहेको धनगढीले पहिलो संस्करणका विशाल राईलाई मार्की खेलाडीमा राखेको थियो । तर, यस संस्करणका लागि विशाल अनुपस्थित हुने भएपछि धनगढीले आशिषलाई मार्कीको रूपमा अनुबन्ध गरेको हो ।

चर्च ब्वाइज युनाइटेडबाट घरेलु लिग खेल्ने आशिषले सन् २०२२ मा बंगलादेशविरुद्धको खेलबाट नेपाली राष्ट्रिय टिमका लागि डेब्यू गरेका थिए । मार्की खेलाडीमा अनुबन्ध भएपछि आशिषले गत सिजन उपविजेता बने पनि टिमले यस सिजन राम्रो नतिजा ल्याउने प्रयास गर्ने बताए ।

“पहिलो सिजन सबैको मिहिनेतले उपविजेता बनेका थियो । यस सिजनमा थप राम्रो नतिजा ल्याउने प्रयासमा छौँ । अक्सनबाट टोलीका लागि आवश्यक पर्ने खेलाडीहरूलाई लिने र थप खेलाडीलाई विदेशबाट भित्र्याउने आन्तरिक तयारी पनि गरिरहेका छौँ । आफ्नोतर्फबाट सक्दो मिहिनेत गर्दै टोलीलाई एकस्थान माथि पुर्‍याउन भूमिका खेल्ने प्रतिबद्धता जनाउँछु । अवसरका लागि टोली सम्पूर्ण टोली व्यवस्थापकलाई धन्यवाद ज्ञापन गर्दछु,” आशिषले भने ।

यस्तै, धनगढी एफसीका अध्यक्ष सुवास शाहीले यस सिजनमा पनि आशिष चौधरीलाई सम्झौता गर्दा एकदमै उत्साहित रहेको बताए ।

“नेपाली फुटबलका प्रतिभावान खेलाडीमध्येका एक आशिषको आगमनसँगै टोलीको ऊर्जा झनै बढेको महसुस भएको छ,” शाहीले भने, “धनगढी एफसीलाई गत सिजनमा तपाईंहरू सम्पूर्णले देखाएको माया र सद्भावप्रति आभार व्यक्त गर्दछौँ । यस सिजनमा पनि यहाँहरूको अपार मायाको अपेक्षा राखेका छौँ ।