काठमाडौं । नेपाली कथानक चलचित्र ‘परदेशी–२’का कलाकारले यतिबेला प्रचारप्रसारलाई तिव्र पारेका छन् । देशका विभिन्न मुख्य सहरमा प्रचार गरिरहेको परदेशीका कलाकार तथा निर्देशक अहिले नेपालगञ्ज पुगेका छन् । 

असोज २६ गतेबाट प्रदर्शनमा आउन लागेको चलचित्र ‘परदेशी–२’का निर्देशक नारायण रायमाझी, अभिनेता प्रकाश सपूत, अभिनेत्री केकी अधिकारीलगायतको समूह दुई दिनदेखि नेपालगञ्जमा छ । 

शनिबार नेपालगञ्ज पुगेर त्यहाँका हल भिजिट गरेको टिमले आइतबार पत्रकारसँग साक्षात्कार गरेको थियो । अभिनेत्री केकीले ‘परदेशी–२’को कथा सबै नेपालीको कथा भएको बताइन् । मौलिक कथामा अभिनय गर्ने रहर ‘परदेशी–२’ले पूरा गरेको उनको भनाइ थियो ।

अभिनेता प्रकाशले ‘परदेशी–२’ आफ्नो पहिलो चलचित्र भएका कारण उत्साहित रहेको बताए ।

चलचित्रले नेपाली समाजको कथा उठान गरेकाले दर्शकले रुचाउनेमा आशावादी रहेको निर्देशक नारायण रायमाझीले बताए । संसार घुमे पनि आफ्नो मातृभूमि र आमाबुबालाई भुल्नु हुँदैन भन्ने चलचित्रको मुख्य कथा रहेको उनले बताए ।