काठमाडौं । सर्लाहीको मलङ्गवा नगरपालिकामा मूर्ति सेलाउने क्रममा उत्पन्न द्वन्द्वले धार्मिक सहिष्णुता खलबल्याउने प्रयास भएको भन्दै मुस्लिम आयोगले सरकारको ध्यानाकर्षण गराएको छ ।

मुस्लिम आयोगका अध्यक्ष समिम मियाँ अन्सारीले आज आइतबार उपप्रधान एवं गृहमन्त्री नारायणकाजी श्रेष्ठलाई भेटेर मलङ्गवा घटनाका सन्दर्भमा ध्यानाकर्षण गराए । उनले मलगंवासहित मधेस प्रदेशका केही जिल्लामा केही अराजक तत्वहरुले धार्मिक सहिष्णुता खलबल्याउने प्रयास गरिरहेको भन्दै दोषीलाई कडा कारबाहीको माग गरे ।

मुस्लिम समुदायको घरघरमा लुट्ने, चेलीबेटीलाई दुव्र्यवहार गर्ने कार्य भइरहेको भन्दै दोषीलाई हदैसम्मको कारबाही गर्न गृहमन्त्रीलाई उनले आग्रह गरे । अन्सारीले मुस्लिम समुदाय सदैव शान्ति, समृद्धी र देशको उन्नति, प्रगतिको पक्षमा रहेको बताए ।

विश्वकर्मा पूजाको मूर्ति सेलाउन ट्रयाक्टरमा मलंगवा नगरपालिका–३ विश्वकर्मा चो पोखरीमा सेलाउन लैजाने क्रममा ट्रयाक्टरमा बजिरहेको डीजे बाजाको विषयलाई लिएर विवाद बढेपछि तनावको स्थिति सिर्जना भएको थियो ।