काठमाडौं । सजिल बस्नेतको सर्ट फिल्म ‘बबल’ले एक लाख नगद पुरस्कार जितेको छ । अस्कर कलेजले आयोजना गरेको पहिलो युवा सर्ट फिल्म प्रतियोगितामा बस्नेतले प्रथम पुरस्कार स्वरुप सो रकम जितेका हुन् ।

प्रतियोगितामा क्षितिज जैसवालको ‘वैराग्य’ले दोस्रो र देव तामाङको ‘खोक्रो’ तेस्रो हुँदै क्रमशः ५० हजार र २५ हजार नगद पुरस्कार प्राप्त गरेका छन् ।

दुई दशकदेखि सिनेमाको प्राज्ञिक अध्यापन गर्दै आएको अस्कर कलेजले आयोजना गरेको ‘पहिलो सर्ट फिल्म प्रतियोगिता’मा १९ वर्षमुनिका उमेर समूहका युवा फिल्मकर्मीबीच प्रतिस्पर्धा गराइएको थियो । गत भदौमा फिल्महरु आह्वान गरिएको प्रतियोगितामा २५ फिल्ममध्येबाट माथिका तीन फिल्म प्रथम, द्वितीय र तृतीय हुन सफल भएका हुन् ।

२५ मध्येबाट सातवटा फिल्म सर्ट लिस्टमा परेका थिए । जसमध्ये निराकारभक्त राईको द पोयटलाई स्पेसल मेन्सन अवार्ड प्रदान गरियो ।

काठमाडौंको सुकेधारास्थित अस्कर कलेजमा शुक्रबार सर्ट लिस्टमा परेका सात फिल्म प्रदर्शन गरी पुरस्कार घोषणा गरिएको हो । सातवटा फिल्म प्रदर्शन गरेपछि निर्देशक तथा अभिनेता निश्चल बस्नेतले ती फिल्मका निर्देशकहरुलाई सर्टिफिकेट प्रदान गरे ।

प्रतिस्पर्धामा समावेश फिल्महरु मनोजबाबु पन्त, फिल्म निर्देशक निरन्जनराज भेटवाल र छायांकार उज्जल बस्ताकोटीको जुरीले छनोट गरेको हो ।

प्रतिस्पर्धामा पुरस्कृत चार फिल्मका निर्देशकलाई अस्कर कलेजमा अध्ययन गर्न चाहेमा ५० प्रतिशत स्कलरसिपसमेत दिने व्यवस्था गरिएको छ ।