काठमाडौं । चीनको होङझाउमा जारी १९औँ एसियाली खेलकुदको महिला फुटबलमा नेपाली टिम भियतनामसँग २–० ले पराजित भएको छ ।

शुक्रबार विनझाउ स्पोर्ट्स सेन्टर रंगशालामा सम्पन्न खेलमा भियतनामलाई जित दिलाउन पाम हाइ यन र एनगुयन हाङले समान एक गोल गरे ।

गत महिना अस्ट्रेलिया र न्यूजिल्यान्डमा भएको फिफा महिला विश्वकप खेलेको भियतनामलाई पहिलो हाफमा गोलरहित रोके पनि नेपालले दोस्रो हाफमा दुई गोल व्यहोर्‍यो । खेलको ५३औँ मिनेटमा यानले गोल गर्दै भियतनामलाई अग्रता दिलाएकी थिइन् ।

यस्तै, ६४औँ मिनेटमा हाङले गोल गर्दै भियतनामको अग्रता दोब्बर बनाएकी थिइन् । यसपछि थप गोल नहुँदा नेपाल २–० ले पराजित भयो ।

जितसँगै तीन अंक जोडेको भियतनाम समूह ‘डी’ को शीर्ष स्थानमा उक्लिएको छ । पहिलो खेलमै हार व्यहोरेको नेपाल पुछारमा छ । अब नेपालले सोमबार जापानको सामना गर्नेछ । यो समूहमा नेपालसँगै भियतनाम, जापान र बंगलादेश छन् ।