काठमाडौं । नेपाल क्रिकेट संघ (क्यान) को निर्वाचनमा बर्दियाका विनय राजभण्डारीले अध्यक्ष पदमा उमेदवारीको घोषणा गरेका छन् ।

राजभण्डारीले वर्तमान अध्यक्ष चतुरबहादुर चन्दको चार वर्षे कार्यकाल असफल भएकाले आफूले उमेदवार दिएको बताए ।

"चतुरबहादुर चन्दको चार वर्षे कार्यकाल असफल भएकाले मैले उमेदवारी दिएको हुँ । उनको कार्यकालमा नेपाल टी–२० ले ठूलो विवाद उत्पन्न गरायो । खेलाडीले लिग खेलेका पैसा पाएका छैनन्," उनले भने, "पहिलो उमेदवारी दिने अनि पछि फिर्ता लिने भन्ने हुन्न । जित–हार जे भए पनि म निर्वाचनमा लड्छु । भोलि चाँडै मेरो प्यानल सार्वजनिक हुनेछ ।"

बर्दियाका अध्यक्ष राजभण्डारी लुम्बिनी प्रदेशका उपाध्यक्ष हुन् । क्यानको निर्वाचन शनिबार हुने तालिका छ । निर्वाचनमा १७ सदस्यीय कार्यसमितिका लागि कुल ८६ मतदाताले मतदान गर्नेछन् ।