काठमाडौं । नेपाली कांग्रेसको केन्द्रीय समिति बैठकमा पार्टीको आसन्न महासमिति बैठक काठमाडौं बाहिर गर्न माग गरिएको छ ।
बैठकमा बोल्ने केन्द्रीय सदस्यहरूले काठमाडौं बाहिर मधेस प्रदेशमा गर्न माग गरेका छन् । साथै महासमितिले नीति अधिवेशनको पनि काम गर्ने भएकाले तीन दिनबाट समय बढाएर पाँच दिनसम्म बैठक सञ्चालन हुनुपर्ने धारणा केन्द्रीय सदस्यहरूको छ ।
बिहीबारबाट सुरु भएको दोस्रो दिनको शुक्रबारको बैठकमा बोल्दै केन्द्रीय सदस्य मधु आचार्यले महासमिति बैठक काठमाडौं बाहिर गर्न अनुरोध गरे । उनले मधेस प्रदेश कार्यसमितिसँग परामर्श गरेर महासमिति बैठक मधेसमा राख्न अनुरोध गरे ।
“महासमितिको बैठक तीन दिनले नपुग्ने देख्छु किनभने नीति अधिवेशनको समेत काम गर्नुछ त्यसैले पाँच दिन पुर्याउन अनुरोध गर्दछु,” उनले भने ।
आचार्यले विषयगत नीति प्रस्ताव समिति गठन गर्नुपर्नेमा जोड दिए । साथै महासमिति बैठकलाई युवा तथा वुद्धिजीवीमैत्री बनाउनका लागि पर्यवेक्षकको समेत व्यवस्था गर्न उनले प्रस्ताव गरे । जसमा एकजना वुद्धिजीवी प्राज्ञिक व्यक्ति र एकजना १८ देखि ३० सम्मको व्यक्तिलाई पर्यवेक्षक बनाउनुपर्ने उनको धारणा थियो ।
यस्तै, अर्का केन्द्रीय सदस्य प्राध्यापक डाक्टर गोविन्द पोखरेलले पनि महासमिति बैठक मधेस प्रदेशमै गर्नुपर्ने धारणा राखे । अर्का केन्द्रीय सदस्य जिपछिरिङ लामाले पनि महासमिति बैठक काठमाडौं बाहिर गर्नुपर्नेमा जोड दिए ।
“वीरगंज, जनकपुर गर्ने वा नेपालगञ्ज कही न कही गर्नुपर्छ यसले पार्टी चलयमान हुन्छ । महासमिति बैठक काठमाडौं गर्ने हैन,” उनले भने ।
कांग्रेसले मंसिर १३ देखि १५ सम्म काठमाडौंमा महासमिति बैठक गर्ने अघिल्लो केन्द्रीय समिति बैठकले निर्णय गरेको थियो ।
-1743849429.jpg)
