काठमाडौं । सरकारले घरजग्गा कारोबारलाई चलायमान बनाउन गत साउन ३० गते कित्ताकाट र नामसारी फुकुवा गर्यो ।
कित्ताकाट र नामसारी फुकाउने गरेर ‘भूउपयोग नियमावली’ पारित गरेको थियो । फुकुवा गरेपछि घरजग्गा कारोबार सुधार हुने अपेक्षा थियो । तर, सरकारी तथ्यांकअनुसार कारोबारमा उत्साह देखिएको छैन ।
भूमि व्यवस्थापन तथा अभिलेख विभागको तथ्यांकअनुसार साउन महिनाभन्दा भदौमा घरजग्गाको कारोबारमा गिरावट आएको छ ।
भूमि व्यवस्थापन तथा अभिलेख विभागका अनुसार आर्थिक वर्ष २०८०/०८१ को भदौमा कुल ३५ हजार ६८६ लिखत पारित भएको छ । जबकी साउनमा ३९ हजार २६३ लिखत पास भएको थियो ।
अर्थतन्त्र सुस्ताएका कारण घरजग्गा कारोबारमा चलायमान हुन नसकेको नेपाल आवास तथा घरजग्गा विकास महासंघका अध्यक्ष भेषराज लोहनीले बताए ।
“एकातर्फ असोजसम्म ‘अफ–सिजन’ हुन्छ । अर्काेतर्फ समग्र अर्थतन्त्र एकदमै सुस्ताएको देखियो । जसले गर्दा कारोबार अपेक्षाकृत हुन सकेन,” लोहनीले बाह्रखरीसँग भने ।
राजश्व संकलनमा सुधार
विभागको तथ्यांकअनुसार भदौमा राजस्व संकलनमा सुधार देखिएको छ । साउनको तुलनामा घरजग्गा कारोबार खुम्चिदा पनि भदौमा राजस्व संकलन बढेको छ ।
विभागका अनुसार तीन अर्ब चार करोड ५९ लाख ४६ हजार ८११ रुपैयाँ संकलन भएको छ । साउनमा दुई अर्ब ९१ करोड चार लाख २७ हजार १९६ रुपैयाँ राजस्व संकलन भएको थियो ।
