विराटनगर । मोरङको विराटनगरस्थित महेन्द्र मोरङ क्याम्पसका प्राध्यापकले उत्तरपुस्तिका साटफेर गरेको भन्दै विवाद भएको छ । प्राध्यापक राजन दत्तले उत्तरपुस्तिका साटफेर गरेको आरोप लगाइएको छ ।

स्नातक तहको पहिलो वर्षको परीक्षा दिएकी आफ्नी छोरीको उत्तरपुस्तिका उनले साटफेर गरेको विद्यार्थीको आरोप छ । विद्यार्थी सन्ध्या कायस्थको उत्तरपुस्तिका दत्तकी छोरी आस्थाको बनाइएको आरोप लगाइएको हो ।

परीक्षामा दत्तकी छोरी उत्तीर्ण भएकी छन् । दत्त सोही क्याम्पसमा अंग्रेजी विषयका प्राध्यापक हुन् ।

अंग्रेजी विषयको उत्तरपुस्तिका साटफेर गरिएका कारण सन्ध्या अनुत्तीर्ण भएको विद्यार्थी संगठनको आरोप छ । विवादपछि विद्यार्थीले बुधबार पार्किङ गरेर राखिएको बा१७च ८२३८ नम्बरको त्रिभुवन विश्वविद्यालय परीक्षा नियन्त्रकको गाडीमा आगजनी गरेका छन् ।

नियमित उत्तीर्ण हुने विद्यार्थीको रिजल्ट नकारात्मक आएपछि क्याम्पस प्रशासनले पुनः परीक्षा लिएको तर नतिजा नआएकाले आफू तनावमा परेको सन्ध्याले बताइन् । उनले भनिन्, “फेरि ब्याक लागेको विषयको पनि दिऊँ, तर रिजल्ट आएको छैन ।”

आफूले थप गरेको चार पानाको विवरण मूलकापीमा समेत लेखेको तर त्यो च्यातिएको पाइएको उनको भनाइ छ । रिटोटलिङ गर्दा पहिलेकै प्राप्तांक देखिएको र उत्तरपुस्तिका हेर्न परीक्षा नियन्त्रण कार्यालयमा निवेदन दिँदा थप गरिएका पेज नरहेको पाएको उनले सुनाइन् । उनले भनिन्, “मेरो हराएको थप उत्तरपुस्तिका दत्तको कापीमा अट्याच्ड गरेको भन्नेमा म ढुक्क छु ।”

दोस्रो वर्षको परीक्षामा भने आफू उत्तीर्ण भएको उनले बताइन् ।

०७८ मंसिरमा पहिलो वर्षको परीक्षा भएको थियो । त्यसमा उनको सिम्बोल नम्बर ६०००३०८८८ थियो । उनले भनिन्, “मैले थप चार पाना उत्तरपुस्तिका मगाएर परीक्षा लेखेकी थिएँ ।” आफ्नो उत्तरपुस्तिका मूलकापीमा गार्डले नै समावेश नगरेको उनको आरोप छ ।

महेन्द्र मोरङ क्याम्पसका प्रमुख बाबुराम तिम्सिनाले यो विवाद कानुनी प्रक्रियामा गइसकेको बताए । अहिल्यै धेरै कुरा भन्न सकिने अवस्था नरहेको उनको भनाइ छ ।

“अनुसन्धानको क्षेत्रमा छ, अख्तियारमा पनि परेको छ । जाँचबुझ हुँदै छ । उत्तरपुस्तिका साटफेर गरेको आरोप पुष्टि हुँदैन । विद्यार्थीले शिक्षकको छोरीमा राखेको भन्ने पुष्टि भएको क्याम्पस प्रशासनको अनुसन्धानबाट पनि देखिएको छैन । आरोप त्यति नै हो । अनुसन्धान क्षेत्रमा छ,” उनले भने ।

‘ब्याक पेपर’ परीक्षा दिएकी सन्ध्याको रिजल्ट आउन बाँकी रहेको र त्यस विषयमा क्याम्पस प्रशासनले केही गर्न नसक्ने उनले बताए । उनले भने, “परीक्षाको नतिजा आउने विषय हाम्रो हातको कुरा होइन ।”

यसैबीच, महेन्द्र मोरङ क्याम्पस र परीक्षा नियन्त्रकलाई प्रवेश गर्न नदिने भन्दै विद्यार्थी संगठनले आन्दोलन घोषणा गरेका छन् । विभिन्न चार विद्यार्थी संगठनले संयुक्त विज्ञप्ति प्रकाशित गरी समस्या समाधानमा चासो नदिए कडा संघर्ष गर्ने चेतावनी दिएका छन् । विद्याथीं संगठनले क्याम्पस प्रमुख र परीक्षा नियन्त्रकलाई कार्यालय प्रवेशमा रोक लगाएका छन् ।

सन्ध्यालाई न्याय दिलाउन आफूहरूले माग गरे पनि वास्ता नगरेको भन्दै नेविसंघ, अनेरास्ववियु, अखिल (क्रान्तिकारी) र समाजवादी विद्यार्थी युनियनले क्याम्पस प्रमुखलाई कामकाज गर्न नदिने चेतावनीसहित विज्ञप्ति प्रकाशित गरेका हुन् । यसअघि पनि ती संगठनले क्याम्पस प्रमुख तिम्सिना र परीक्षा नियन्त्रक डिल्ली प्रसाइँलाई विद्यार्थीले उठाएको मागबारे गम्भीर भएर समस्या समाधान गर्न आग्रह गरेका थिए ।