काठमाडौं । पार्टीमा सभापति शेरबहादुर देउवाले एकलौटी गरेको भन्दै कांग्रेसको इतर समूहका नेता शेखर कोइरालाले आपत्ति जनाएका छन् । 

बुधबार बिहान ११ बजे देउवा निवास धुम्बाराही पुगेर शेखरले पार्टीमा भातृ संस्था गठनदेखि कुनै पनि विषय न्यायोचित ढंगबाट हुन नसकेको भन्दै आपत्ति जनाएका थिए । 

शेखरले मंगलबार समूहको बैठक बोलाएका थिए । बैठकको निर्णयअनुसार उपसभापति धनराज गुरुङ र सहमहामन्त्री जीवन परियारलाई लिएर उनी देउवा निवास पुगेका थिए । आधा दर्जन एजेन्डा बोकेर शेखरले देउवासँग आक्रोश पोखेको एक नेताले बाह्रखरीलाई जानकारी दिए । 

“विविध विषयमा शेखर दाइले राख्नुभयो । तर, देउवाले हुन्छ गर्छु, सल्लाहमै गरिरहेको छु । थप छलफल गर्छु भनिरहनु भयो,” ती नेताले भने, “अन्तिममा शेखर दाइले शेरबहादुरजी तपाईंसँग म कुरा गर्न आउँदिन । जति कुरा गरेपनि तपाईंले पालना गर्ने हैन । म केही पनि भन्न आउँदिन भन्नुभयो ।”

शेखरले भातृ संस्था गठन, पार्टी निर्वाचन समिति, पार्टीको विभाग गठन, प्रदेश सरकार बनाउँदा छलफल र सल्लाहमा नगरेको भन्दै आक्रोश पोखेका थिए । 

“कुनै पनि कुरा न्यायोचित भएन एकलौटी गर्न थाल्नुभयो भनेपछि देउवाले होइन मैले सल्लाहमै गरेको छु भन्नुभयो,” ती नेताले भने, “शेखर दाइले अब आउँदिन भनेपछि देउवाले म आफैँ सल्लाह गर्न आउँछु तपाईंकोमा भन्नुभयो ।”

बैठकमा सरकारको विषयमा धेरै कुरा नउठे पनि सुशासनको विषयमा कांग्रेसले अपनत्व लिनेगरी के काम गर्न सकेको छ भन्ने प्रश्न शेखरले देउवासमक्ष राखेका थिए । 

साथै उनले कोसी प्रदेश सरकार गठनमा आफूलाई नसोधिएको, विधान संवत् बन्नुपर्ने समितिहरूमा पनि एकलौटी भएको भनेका थिए । 

तल्लो तहमा चुनाव हारेकाहरूलाई पार्टीको केन्द्रीय समिति सदस्य कुन मापदण्डमा बनाइयो भन्ने प्रश्न शेखरले बैठकमा राखेको ती नेताले जानकारी दिए । 

आधा घण्टासम्म सुनेर बसेका देउवाले सल्लाहमै गरेको छु, सल्लाह गर्छु बाहेक थप केही नभनेको ती नेताले बाह्रखरीलाई जानकारी दिए ।

भातृ तथा शुभेच्छुक संस्थाको तदर्थ समिति आएपनि पार्टीमा विवाद मिल्न सकेको छैन । विवादकै बीच संस्थापनले एकलौटी गरेको भन्दै इतर समूहले समानान्तर समिति बनाउन थालेको छ । केही जिल्लामा महिला संघ र नेविसंघको समानान्तर समिति गठन भएका छन् ।