काठमाडौं । अभिनेता नीर शाहले अवार्डको औचित्य र गरिमामाथि प्रश्न उठाएका छन् । जाथाभावी बिनामापदण्ड दिइने सिने अवार्डले आफ्नै मर्यादा घटाइरहेको उनको भनाइ छ ।

“केही समयअगाडि एउटा अवार्डको कार्यक्रम थियो, त्यो अवार्ड कार्यक्रममा म पनि थिएँ,” केही समयअघि अभिनेता खगेन्द्र लामिछानेको पुस्तक ‘पानीफोटो’को विमोचन कार्यक्रममा शाहले भने, “अवार्ड वितरण गर्ने अतिथिमा म पनि थिएँ, वितरणको कार्यक्रम सकेर ड्यासमा बसेर हेर्दा हलमा बस्ने सबैका हातमा कम्तीममा एक/एकवटा अवार्ड थिए ।”

काम र सिनेमाको मूल्यांकनभन्दा पनि अवार्ड बाँडीचुँडी लिने संस्कार बढ्दै गएकामा उनले असन्तुष्टि जनाए । “कुन प्रयोजनका लागि यस्तो हुन्छ त्यो सबैलाई थाहै छ, मैले बोलिरहनु पर्दैन,” उनले भने ।

नेपाली सिनेमाको मेकिङ अब नयाँ पुस्तालाई हस्तान्तरण गर्नुपर्नेमा उनले जोड दिएका थिए । निश्चल बस्नेत, खगेन्द्र लामिछाने, दीपेन्द्र के खनाललगायत नयाँ पुस्ताले अबको नेपाली चलचित्र उद्योगको नेतृत्व गर्नुपर्ने उनको भनाइ छ ।