![दीपक भन्छन्– हाम्रो प्राथमिकता नेपाली सिनेमा, निर्मातालाई ५० प्रतिशत सेयर दिन्छौँ](https://12khari.top/uploads/posts/deepakk-1694774807.jpg)
काठमाडौं । कलाकार तथा निर्माता दीपकराज गिरीले आफ्नो हलले निर्मातालाई ५० प्रतिशत सेयर दिने बताएका छन् । आजबाट सञ्चालनमा आएको आफ्नो सिनेमा हल आईएनआई सिनेमाको उद्घाटनपछि उनले नेपाली सिनेमाका निर्मातालाई सिनेमाको प्रदर्शनबाट उठेको रकमको ५० प्रतिशत सेयर दिने बताएका हुन् ।
“प्रोडुसरको रूपमा मैले धेरै आवाज उठाएको छु । आज प्रदर्शकको रूपमा आइपुग्दा बिचमा बसेर काम गर्नुपर्ने अवस्था आएको छ । मैले सधैँ भन्ने गरेको प्रदर्शक र निर्माताको सेयर ५०/५० प्रतिशत होस् भन्ने हो,” उनले भने, “हल र निर्माता दुवैलाई बचाउनु पर्छ । यो हलमा नेपाली सिनेमाबाट उठेको सेयरको ५० प्रतिशत रकम निर्मातालाई दिने घोषणा गर्छु ।”
दीपक–दीपाको सिनेमा हल आईएनआई आजबाट सञ्चालनमा
अरु हलले पनि यस्तै निर्णय गर्ने उनको विश्वास छ । प्रदर्शक र निर्माताबीचको सेयर बाँडफाँटको हिस्साबारे रहेको विवाद सुल्झाउन कार्यदलले काम गरिरहेको र उक्त कार्यदलले यही निर्णय गर्नेमा उनी ढुक्क सुनिए ।
उनले शो बाँडफाँटमा व्यवस्थापकलाई हस्तक्षेप नगर्ने तर नेपाली सिनेमालाई प्राथमिकता दिने प्रतिबद्धता जनाए । आफू प्रदर्शकभन्दा पनि पहिला निर्माता भएको भन्दै उनले चलिरहेको नेपाली सिनेमा उतारेर हिन्दी वा अंग्रेजी चलचित्र लगाउने पक्षमा नरहेको बताए ।
तर, यसका लागि नेपाली सिनेमाले व्यापार भने गर्नु पर्नेमा उनको जोड छ । दयामायाले मात्रै सिनेमा नचल्ने दीपकको भनाइ छ ।
“चलचित्रले राम्रो व्यापार गर्दागर्दै हाम्रो हलबाट नेपाली चलचित्र उत्रिने छैन यो विश्वास दिलाउँछु,” उनी भन्छन्, “तर, यसका लागि चलचित्र पनि चल्नु पर्छ । माया र प्रेमले मात्रै सिनेमा चल्दैन, सिनेमा चल्न दर्शक नै आउनुपर्छ ।”
दीपकराज गिरी, दीपाश्री निरौलालगायतले निर्माण गरेको सिनेमा हल आईएनआई आजबाट सञ्चालनमा आएको छ ।