काठमाडौं । कोसोभोसँगको खेलपछि युरोपेली फुटबल महासंघ (यूईएफए)ले रोमानियामाथि जातीयवादी व्यवहारसहित पाँचवटा अपराध गरेको आरोप लगाएको छ ।

युरो–२०२४ को छनोटअन्तर्गत मंगलबार बचरेस्टमा सम्पन्न खेलमा घरेलु टिमका समर्थकले उत्तेजक नारा लगाएपछि खेल ५० मिनेटसम्म रोकिएको थियो । 

रोमानियाका केही समर्थकले ‘सर्विया–सर्विया’ को नारा लगाएका थिए । केहीले भने ‘कोसोभो सर्विया हो’ लेखेको ब्यानरसमेत प्रदर्शन गरेका थिए । 

यस घटनाका कारण यूईएफएले रोमानिया फुटबल संघमाथि ‘आक्रामक प्रकृतिमा उत्तेजित सन्देश’ देखाएको जिम्मेवार ठहर्‍याएको छ । 

कोसोभोले सर्ब र मुख्यतया अल्बेनियाली बासिन्दाहरू बीचको तनावपूर्ण अवस्थापछि सन् २००८ को फेब्रुअरी सर्बियाबाट एकपक्षीय रूपमा स्वतन्त्रताको घोषणा गरेको थियो । 

कोसोभोको स्वतन्त्रतालाई विश्वभरका करिब १०० देशले मान्यता दिएका छन् । जसमा बेलायत पनि समावेश छ । तर, रोमानियाले भने कोसोभोको स्वतन्त्रतालाई मान्यता दिएको छैन ।

यूईएफएले रोमानियाको फुटबल महासंघमाथि कोसोभोविरुद्धको खेलमा प्रशंसकहरूले विभिन्न वस्तुहरू फ्याकेको, आतिशबाजी प्रहार गरेको र सार्वजनिक बाटोहरू अवरुद्ध गरेको आरोप लगाएको छ । उक्त खेलमा रोमानियाले कोसोभोलाई २–० ले हराएको थियो ।